काठमाडौं, २१ चैत्र । गृहमन्त्री सुधन गुरुङले नेकपा एमालेका अध्यक्ष एवं तत्कालीन प्रधानमन्त्री केपी शर्मा ओलीलाई पक्राउ गरिएको विषयमा सर्वोच्च अदालतमा लिखित जवाफ पेस गरेका छन्।ओलीले आफूलाई गैरकानुनी पक्राउ गरिएको भन्दै सर्वोच्चमा दायर गरेको बन्दी प्रत्यक्षीकरण रिटमा गृहमन्त्री गुरुङले शुक्रबार लिखित जवाफ पेस गरेका हुन्।मन्त्री गुरुङले जाँचबुझ आयोगको सिफारिस र जाहेरी सम्बन्धमा अनुसन्धानका लागि अधिकारप्राप्त अधिकारीबाट कानुन बमोजिम पक्राउ पुर्जी जारी भएको लिखित जवाफ सर्वोच्च अदालतमा पेस गरेका छन् ।

ओलीलाई गलत वा अन्य कुनै कारणले पक्राउ गरिएको भन्न नमिल्ने गुरुङले लिखित जवाफमा उल्लेख गरेका छन् ।गुरुङले अगाडि भनेका छन्,‘प्रचलित कानुनले कसुर मानेको कार्यका सम्बन्धमा कानुनी प्रक्रिया पूरा गरी सक्षम अदालतको अनुमति प्राप्त गरी अभियोगका सम्बन्धमा अनुसन्धान भएको कार्यलाई गैरकानुनी किसिमले पक्राउ गरी थुनामा राखिएको भन्ने दाबी कानुनसम्मत नभएको हुँदा रिट निवेदन खारेजभागी छ, खारेज गरिपाऊँ।’ चैत १६ गते ओलीको बन्दी प्रत्यक्षीकरण रिटमाथि सुनुवाइ गर्दै सर्वोच्चले सरकारसँग जवाफ मागेको थियो।

गत भदौ २३ र २४ गते भएको जेनजी आन्दोलनको अनुसन्धान गर्न गठित पूर्वन्यायाधीश गौरी बहादुर कार्की नेतृत्वको जाँचबुझ प्रतिवेदन बालेन शाह नेतृत्वको सरकारले कार्यान्वयन गर्ने निर्णय गरेको थियो। सोही अनुरुप तत्कालीन प्रधानमन्त्री ओली र गृहमन्त्री रमेश लेखक पक्राउ परेका थिए।