काठमाडौं । जिल्ला अदालत, काठमाडौंले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक लाई पाँच दिन हिरासतमा राखेर अनुसन्धान गर्न अनुमति दिएको छ ।

आइतबार (चैत १५) न्यायाधीश आनन्दप्रसाद श्रेष्ठ को इजलासले प्रहरीको म्याद थप निवेदन स्वीकृत गर्दै उक्त अनुमति दिएको हो ।

घटनाक्रम

• प्रहरीले शनिबार (चैत १४) कार्की आयोगको प्रतिवेदन को आधारमा ओली र लेखकलाई पक्राउ गरेको थियो ।
• आइतबार प्रहरीले दुवैलाई हिरासतमै राखेर अनुसन्धान गर्न म्याद थपका लागि जिल्ला अदालतमा निवेदन दिएको थियो ।
• सरकारी वकिलले हिरासतमै राख्नुपर्ने माग गरेका थिए भने ओली र लेखकको पक्षबाट बहस गर्ने कानुन व्यवसायीहरूले हिरासत मुक्त गर्नुपर्ने जिकिर गरेका थिए ।
• पूर्वगृहमन्त्री रमेश लेखक अदालतमा व्यक्तिगत उपस्थित भएका थिए ।
• पूर्वप्रधानमन्त्री केपी शर्मा ओली त्रिवि शिक्षण अस्पताल मा उपचाररत भएकाले भिडिओ कन्फ्रेन्स मार्फत बहसमा सहभागी भएका थिए । उनको स्वास्थ्य अवस्था हेरेर चिकित्सकले अदालतमा उपस्थित गराउन नसकिने सुझाव दिएका थिए ।

ओली र लेखक दुवैलाई जेन-जी आन्दोलन (२०८२ भदौ २३ र २४) मा भएको हिंसा, गोलीकाण्ड र आगजनी सम्बन्धी घटनामा कार्की आयोगले गरेको सिफारिसका आधारमा पक्राउ गरिएको हो । आयोगले पहिलो दिनको गोलीकाण्डमा उच्च राजनीतिक नेतृत्व र सुरक्षा निकायको भूमिका रहेको ठहर गर्दै फौजदारी अनुसन्धान सिफारिस गरेको थियो ।

अदालतले दिएको ५ दिनको हिरासत म्यादपछि प्रहरीले थप अनुसन्धान गरी सरकारी वकिल कार्यालयमा प्रतिवेदन बुझाउने छ ।

एमालेको प्रतिक्रिया

एमालेले ओलीको पक्राउलाई “राजनीतिक प्रतिशोध” भन्दै सडक र कानुनी दुवै मोर्चाबाट विरोध जारी राख्ने बताएको छ । पार्टीले आजै जिल्ला सदरमुकामहरूमा विरोध प्रदर्शन गरेको थियो र भोलि (चैत १५) व्यापक प्रदर्शन गर्ने कार्यक्रम रहेको छ ।

यो घटनाले नयाँ बालेन सरकार र प्रमुख प्रतिपक्ष एमालेबीच तीव्र राजनीतिक द्वन्द्व सुरु भएको संकेत गरेको छ । अब ओली र लेखकको हिरासत अवधिमा प्रहरीले कस्तो अनुसन्धान गर्छ र अदालतले कस्तो निर्णय गर्छ भन्ने हेर्न बाँकी छ ।

अपडेट : ओलीको स्वास्थ्य अवस्था अस्पताल स्रोतका अनुसार स्थिर छ । उनको उपचार जारी छ ।