काठमाडौं, चैत १२ — रवि लामिछाने विरुद्ध दायर मुद्दामा सर्वोच्च अदालतले आज पनि आदेश जारी गर्न सकेन। सुनुवाइ ‘हेर्दाहेर्दै’ मा राखिएको यो मुद्दा अब आइतबारका लागि सरेको छ।

संगठित अपराध र सम्पत्ति शुद्धीकरणसम्बन्धी मुद्दा फिर्ता गर्ने महान्यायाधिवक्ताको निर्णयविरुद्ध दायर रिट निवेदनमाथि सुनुवाइ जारी छ। सर्वोच्च अदालत मा न्यायाधीशद्वय विनोद शर्मा र अब्दुल अजिज मुसलमानको संयुक्त इजलासमा केही दिनयता निरन्तर बहस भइरहेको छ।

यसअघि मंगलबार रिट निवेदकका तर्फबाट बहस सकिएको थियो भने बिहीबार महान्यायाधिवक्ता कार्यालयका सरकारी वकिलहरूले जवाफी बहस प्रस्तुत गरेका छन्। बहस जारी रहेकाले अदालतले मुद्दालाई ‘हेर्दाहेर्दै’ मा राख्दै अर्को सुनुवाइको मिति आइतबारका लागि तोकेको हो।

सविता भण्डारी ले पुस ३० गते लामिछानेको हकमा अभियोगपत्र संशोधन गर्ने निर्णय गरेकी थिइन्। त्यसपछि बढ्दो आलोचनाबीच २ माघमा अन्य आरोपितहरूको हकमा पनि समान निर्णय गरिएको थियो।

यसअघि नै सर्वोच्च अदालतले मुद्दा फिर्तासम्बन्धी निर्णयका कागजात माग गरिसकेको छ। अब आइतबार हुने सुनुवाइमा बहस सकिएपछि आदेश आउने अपेक्षा गरिएको छ।

मुद्दाको प्रकृति र राजनीतिक संवेदनशीलताका कारण यो प्रकरणलाई चासोका साथ हेरिएको छ।