काठमाडौं, २ चैत । काठमाडौं उपत्यकामा सोमबार साँझ हावाहुरी र गड्याङगुडुङसहित वर्षा भएको छ।

साँझपख अचानक मौसम बदलिएसँगै उपत्यकाका विभिन्न स्थानमा हावाहुरी चल्नुका साथै पानी परेको हो। पछिल्लो केही दिनदेखि उपत्यकामा वायु प्रदूषण उल्लेख्य रूपमा बढेको अवस्थामा वर्षा भएपछि प्रदूषणको स्तर केही घट्ने अपेक्षा गरिएको छ।

जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल मुलुकमा पश्चिमी न्यून चापीय प्रणालीको आंशिक प्रभाव रहेको छ। सोही प्रणालीका कारण देशका विभिन्न क्षेत्रमा मौसममा परिवर्तन देखिएको विभागले जनाएको छ।

विभागका अनुसार आज गण्डकी प्रदेश, कर्णाली प्रदेश र सुदूरपश्चिम प्रदेशका हिमाली भू–भागका केही स्थानमा तथा अन्य हिमाली क्षेत्रमा एक–दुई स्थानमा गड्याङगुडुङ र चट्याङसहित हल्का वर्षा तथा हिमपातको सम्भावना रहेको छ।

मौसमविद्हरूले मौसममा आएको यो परिवर्तनका कारण देशका विभिन्न स्थानमा आंशिक बदली र हल्का वर्षा हुन सक्ने बताएका छन्।