काठमाडौँ, ५ माघ २०८२ — राष्ट्रिय स्वतन्त्र पार्टी (रास्वपा) मा प्रवेश गरेका डा. अमरेशकुमार सिंहले अबको प्रधानमन्त्री बालेन्द्र शाह (बालेन) नै बन्ने दाबी गर्दै अत्यन्तै विवादास्पद अभिव्यक्ति दिएका छन्।

जनकपुरमा आयोजित कार्यक्रममा सिंहले बालेन प्रधानमन्त्री नबने आफू जनकपुरमै आत्मदाह गर्ने भन्दै दोहोर्‍याएर चेतावनीपूर्ण अभिव्यक्ति दिएका हुन्।

उनले भने,

“हामी सीता माताका सन्तान हौँ। सीता माता यही धर्तीमा समाहित हुनुभएको थियो। बालेन प्रधानमन्त्री भएनन् भने म पनि जनकपुरकै धर्तीमा समाहित हुनेछु।”

सिंहले बालेनलाई देशको महानायक भन्दै भावनात्मक भाषण गरेका थिए। उनले गम्छा देखाउँदै मत माग्दै भने,

“मसँग केही छैन। गम्छामा भिख माग्छु—मधेशलाई प्रधानमन्त्री देऊ।”

राजनीतिक वृत्तमा चर्को आलोचना

सिंहको उक्त अभिव्यक्तिलाई लिएर राजनीतिक र नागरिक वृत्तमा गम्भीर आलोचना सुरु भएको छ। आत्महानीसँग जोडिएका यस्ता अभिव्यक्तिले लोकतान्त्रिक बहसलाई कमजोर बनाउने र समाजमा गलत सन्देश जाने भन्दै सामाजिक सञ्जालमा विरोध भइरहेको छ।

पार्टीको आधिकारिक धारणा आउन बाँकी

रास्वपाले सिंहको अभिव्यक्तिबारे आधिकारिक प्रतिक्रिया भने सार्वजनिक गरिसकेको छैन। पार्टी नेतृत्वबाट यस विषयमा स्पष्ट धारणा आउने अपेक्षा गरिएको छ।