काठमाडौं, १६ साउन । प्रमुख प्रतिपक्षी दल नेकपा एमालेले भरतपुर महानगरपालिका वडा नम्बर १९ मा पुन: मतदान गर्न सर्वोच्च अदालतले दिएको आदेश दु:खद् भएको टिप्पणी गरेको छ ।

पार्टी स्थायी समिति बैठकले भरतपुर महानगरपालिका वडा नम्बर १९ मा पुन: मतदान गर्न सर्वोच्च अदालतले दिएको आदेश दु:खद् भएको प्रतिक्रिया दिएको हो । भक्तपुरको बालकोटस्थित पार्टी अध्यक्ष केपी शर्मा ओली निवासमा सोमबार बसेको बैठकले सर्वोच्च अदालतको आदेशले जनताको अभिमतको अपमान गरेको निष्कर्ष निकाल्दै भविष्यमा गलत नजिर स्थापित हुने आशंका र चिन्ता समेत व्यक्त गरेको छ ।

बैठकपछि पार्टीका सचिव एवम् प्रचार विभाग प्रमुख योगेश भट्टराईले यो जानकारी दिनु भएको हो । उहाँले सर्वोच्चको यो आदेशले भविष्यमा गलत नजिर बस्ने हो कि भन्ने चिन्ता पार्टी पंक्तिमा छाएको प्रतिक्रिया पनि दिनु भयो । बैठकले भरतपुर वडा नम्बर १९ का जनताले आफ्नो अभिमतको रक्षा गर्दै पार्टीका उम्मेदवार देवी ज्ञवालीको पक्षमा मतदान गरी न्याय गर्ने विश्वास पनि व्यक्त गरेको छ ।

सचिव भट्टराईले बैठकले भरतपुर महानगरपालिका वडा नम्बर १९ मा पुन: मतदान हुने भएकाले त्यसको तयारीमा जुट्न पनि स्थानीय पार्टीलाई निर्देशन दिइएको पनि उल्लेख गर्नु भयो ।

एमालेले सबै तहको निर्वाचन सम्पन्न नभई संविधान संशोधन प्रस्ताव अघि नबढाउन पनि सरकार र सत्तारुढ दलहरुलाई चेतावनी दिएको छ । सचिव भट्टराईले सबै तहको निर्वाचन सम्पन्न नभई संविधान संशोधन प्रस्ताव अघि नबढाउने सहमति उल्लंघन नगर्न पनि सरकार र सत्तारुढ दलहरुलाई बैठकले आग्रह गरेको जानकारी दिनु भयो । उहाँले संसदमा विचाराधिन संविधान संशोधन प्रस्तावमा पार्टीको गम्भिर असहमति रहेको पनि स्मरण गराउनु भयो ।

पार्टी स्थायी समिति बैठकले देशका विभिन्न जिल्लामा जिल्ला समन्वय समितिका प्रमुख र उपप्रमुखको उम्मेदवारी पनि तय गरेको छ । काठमाडौंको प्रमुखमा शिव बैद्य र उपप्रमुखमा सरिता दाहाललाई उम्मेदवार बनाइएको छ । त्यसैगरी धादिङमा जगन्नाथ नेपाललाई प्रमुख र विन्दबरण नेपालीलाई उपप्रमुख, दैलेखमा प्रेमबहादुर थापालाई प्रमुख र लक्ष्मी शाहलाई उपप्रमुख, ताप्लेजुङमा घनेन्द्र मादेनलाई प्रमुख र देवीमाया नेपालीलाई उपप्रमुख, सिन्धुपाल्चोकमा गोपाल तामाङलाई प्रमुख र बालकुमारी सापकोटालाई उपप्रमुखको उम्मेदवार बनाउने निर्णय गरिएको छ ।

एमालेले पार्टी जिल्ला कमिटी र प्रदेश कमिटीको सिफारिसमा जिल्ला समन्वय समितिका उम्मेदवारहरु तय गर्दै आएको छ ।