बुटवल, ६ फागुन ।
प्रदेशसभा ५ को उपसभामुखमा बाम गठबन्धनकी कृष्णी थारु निर्र्वािचत भएकी छिन् । उपसभामुख पदका लागि एमालेबाट थारु र कांग्रेसबाट रिना नेपाल बिकको उम्मेदवारी परेकोमा थारुले ६६ मत ल्याउंदै निर्वाचित भएकी हुन् ।
संसदको आजको बैठकम उपस्थित ८५ सांसदमध्ये थारुको पक्षमा ६६ र विपक्षमा १९ मत परेको छ । संसमा प्रतिनिधित्व गर्ने संघीय समाजवादी फोरम र राष्ट्रिय जनमोर्चाले पनि वाम गठबन्धनकी उम्मेदवार थारुलाई समर्थन गरेका थिए । प्रदेश नम्बर ५ को प्रदेशसभामा फोरमबाट ५ र राष्ट्रिय जनमोर्चाका १ जना सांसद् छन् । राष्ट्रिय जनता पार्टीका १ जना सांसद्ले भने सपथ ग्रहण नगर्दै राजिनामा बुझाएको बताईएको छ ।
निर्वाचित भए लगत्तै संचारकर्मीहरुसंग कुरा गदै उपसभामुख कृष्णी थारुले प्रदेशको निति निर्माणमा तथा दलहरुबिच समन्य गर्नेमा आफ्नो सक्रिय भूमिका रहने बताउनुभयो ।
नवनिर्वाचित उपसभामुख थारु आफैमा पुर्व कमलरि हुन् । कमलरि मुक्त भएपछि पनि उनले लामो समय देखि कमलरिको अधिकारका लागि काम गर्दै आएकी थिईन् ।
यस अघिनै प्रदेश ५ को प्रदेशसभा सभामुखमा नेकपा माओवादी केन्द्रका पूर्णबहादुर घर्ती निर्विरोध निर्वाचित भइसकेका छन् ।
१ बजे सुरु भएको बैठकको प्रारम्भमै सभामुख घर्तीले एमाले माओवादी गठबन्धनका उमेदवार एमाले संसदीय दलका नेता शंकर पोखरेललाई प्रदेश प्रमुख उमाकान्त झाले मुख्यमन्त्रीमा नियुक्त गरेको भनी प्रदेश प्रमुखको कार्यालयबाट प्राप्त पत्र पढेर सुनाएका थिए । निर्वाचन लगत्तै उपसभामुख थारुले आफ्नो कार्यभार समेत सम्भालेकी छिन् । कार्यभार सम्हाल्नु अघि प्रदेश नम्बर ५ का प्रदेशसभाका सभामुख पुर्णबहादुर घर्तीले थारुलाई उपसभामुख पदको सपथ ग्रहण गराउनुभएको थियो ।