माले, २१ माघ । मालदिभ्स्का राष्ट्रपति अब्दुल्लाह यामिनले यहाँका नागरिकलाई शान्त र संयमित रहन आइतबार आग्रह गर्नुभएको छ ।
आइतबार उहाँले राष्ट्रिय प्रशारणबाट देशवासीका नाममा सम्बोधनगर्दै सो आग्रह गर्नुभएको समाचारमा जनाइएको छ ।
प्राप्त समाचारअनुसार उहाँले देशमा यतिखेर राजनीतिक संकट बढिरहेकोले यस्तो बेलामा सबै देशवासी संयमित भएर रहनुपर्नेमा जोड दिनुभएको हो ।
मालदिभ्स्मा केही दिनयतादेखि आन्दोलन चर्किएको छ । दक्षिण एसियाको यो सानो टापू राष्ट्रमा केही वर्षयतादेखि राजनीतिक अस्थिरता बढिरहेको पाइएको छ ।
उहाँले यहाँका सुरक्षा अंग तथा आन्दोलनरत विपक्षी कार्यकर्ताहरुलाई शान्त रहन आग्रह गर्नुभएको मालदिभ्स्को राष्ट्रपतिको कार्यालयद्धारा जारी गरिएको विज्ञप्तिमा पनि जनाइएको छ ।
मालदिभ्सको सर्वाेच्च अदालतले बिहीबारको एक फैसलामा यहाँका सबै राजनीतिक बन्दीहरुलाई रिहागर्न आदेश दिएको छ ।
उक्त फैसलाबाट मालदिभ्स्का पूर्व राष्ट्रपति मोहम्मद नसिद र पूर्व उपराष्ट्रपति अहमद अदिबलाई पनि गर्नुपर्ने हुन्छ । तर वर्तमान सरकार उनीहरुलाई रिहागर्ने पक्षमा छैन ।
सोही कारण पूर्व राष्ट्रपति नसिदका कार्यकर्ताहरुले उहाँलाई रिहा गर्नुपर्ने मागगर्दै मालदिभ्स्को राजधानी मालेमा बिहीबारदेखि नै व्यापक मात्रामा प्रदर्शन गर्र्दै आएका छन् ।
कैयौँ स्थानमा प्रहरीसँगको भिडन्तका कारण दर्जनौँ व्यक्ति घाइते पनि भएका छन् । त्यस्तै बिहानैदेखि राजधानीमा प्रदर्शनहरु सुरु हुने गरेका छन् ।
नसिद सन् २००८ मा भएकोे निर्वाचनमा मालदिभ्स्को राष्ट्रपतिमा निर्वाचित हुनुभएको हो । तर उहाँलाई सन् २०१२ को फेब्रुअरी महिनामा ‘कू’ गरेर हटाइएको थियो ।
उहाँलाई तत्कालीन सरकारले भ्रष्टाचारको आरोपमा पक्राउ गरेको थियो । पछि अदालतले १३ वर्षको जेल सजाय सुनाएको थियो ।
राजनीतिक आस्थाका आधारमा उहाँलाई जेल हालिएको उहाँको राजनीतिक दलका कार्यकर्ताले बताउँदै आएका छन् ।
मालदिभ्स्का राष्ट्रपति यामिनले आगामी सेप्टेम्बर महिनामा राष्ट्रपतिको निर्वाचन आह्वान गर्नुभएको छ ।
त्यसैले पनि सो निर्वाचनअगावै सबै राजनीतिक बन्दीहरुलाई रिहागरी उनीहरुलाई पनि निर्वाचनमा सहभागिताको अवसर दिनुपर्ने भन्दै सर्वाेच्च अदालतले सो निर्वाचन अगावै सबै राजनीतिक बन्दीहरुलाई रिहा गर्नुपर्ने आदेश दिएको हो ।
राष्ट्रपति यामिनले उक्त निर्वाचनका लागि वातावरण बनाउन आफूले सर्वाेच्च अदालतसँग परामर्श गरिरहेको र निश्पक्ष र स्वतन्त्र निर्वाचनका लागि लागिपरेको भन्दै सबैलाई शान्त रहन आग्रह गर्नुभएको हो । (रासस÷सिन्ह्वा)
प्रतिक्रिया दिनुहोस्