काठमाडौँ, १८ माघ । चुनावमा नयाँ समीकरण बनाएर बहुमत ल्याएको वाम गठबन्धनले सरकार नबनाउँदै काठमाडौँ आइपुग्नु भएकी भारतीय विदेशमन्त्री शुष्मा स्वराजले आफु छुट्टै एजेन्डा केही नलिएर आएको बताउनु भएको छ ।

नयाँ सत्ता समीकरण र वाम गठबन्धनको नेतृत्वमा बन्न लागेको नयाँ सरकारसँग सहकार्य गर्नका लागि आफु काठमाडौँ आएको स्वराजको दाबी छ । ‘यो भ्रमणमा छुट्टै केही एजेन्डा छैन’ छिमेकी देशका नेता र दलहरुसँग मिल्न आएकी हुँ ।’

एमाले अध्यक्ष केपी शर्मा ओलीको नेतृत्वमा नयाँ सरकार बन्न लागेका बेला स्वराजको भ्रमणलाई निकै चासोका साथ हेरिएको छ । खासगरी नयाँ संविधान जारी भइसकेपछि भारतसँग कडा रुपमा प्रस्तुत हुदैँ आउनु भएका ओलीसँग काम गर्न विगतका सरकारसँग जस्तो सहज हुन नसक्ने ठानेपछि भारतीय प्रधानमन्त्री नरेन्द्र मोदीले विशेष दुतका रुपमा स्वराजलाई काठमाडौँ पठाउनु भएको हो ।

बिहीबार बेलुकी साढे ६ बजे होटल सोल्टीमा भारतीय विदेशमन्त्री स्वराज र एमाले अध्यक्ष तथा भावी प्रधानमन्त्री केपी शर्मा ओलीबीच भेटवार्ताको कार्यक्रम छ । स्वराजले ओलीले भेटेपछि बिहीबार नै मधेसकेन्द्रीत दलका नेतासँग पनि भेटवार्ता गर्ने कार्यक्रम तय भएको छ ।