काठमाडौँ, १५ वैशाख । गण्डकी प्रदेश र लुम्बिनी प्रदेशका नवनियुक्त मुख्यमन्त्रीहरूले आज शपथग्रहण गर्दै छन् । बिहीबार गण्डकी प्रदेशको मुख्यमन्त्रीमा नेपाली कांग्रेसका सुरेन्द्रराज पाण्डे नियुक्त भएका थिए भने लुम्बिनी प्रदेशको मुख्यमन्त्रीमा कांग्रेसकै डिल्लीबहादुर चौधरी नियुक्त भएका थिए ।

गण्डकी प्रदेश प्रमुख पृथ्वीमान गुरूङले बिहीबार पाण्डेलाई मुख्यमन्त्रीमा नियुक्त गरेका हुन् । ६० सदस्यीय गण्डकी प्रदेशसभामा उनलाई कांग्रेसका २७, नेकपा (माओवादी केन्द्र)का ७ जनासहित ३५ जनाले समर्थन गरेका छन् ।

नवनियुक्त मुख्यमन्त्री पाण्डे गोरखा–२ (ख)बाट प्रदेशसभा सदस्यमा निर्वाचित भएका हुन् । विश्वासको मत गुमाउँदै नेकपा (एमाले)का खगराज अधिकारी नेतृत्वको सरकार ढलेपछि यहाँ नयाँ गठबन्धन सरकार बनेको हो ।

यस्तै, लुम्बिनीका नवनियुक्त मुख्यमन्त्री चौधरीलाई प्रदेशका ८ दलका ५२ र एकजना स्वतन्त्र सांसदको समर्थन रहेको छ । नेपाली कांग्रेसका २७ जना, माओवादी केन्द्रका १० जना, नागरिक उन्मुक्ति पार्टीका ४ जना, जनमत पार्टीका ३ जना, जनता समाजवादी पार्टीका ३ जना, लोकतान्त्रिक समाजवादी पार्टीका ३ जना, राष्ट्रिय जनमोर्चा र नेकपा (एकीकृत समाजवादी)का एक–एक जना तथा एकजना स्वतन्त्र सांसदसमेत गरी ५३ जना सांसदको समर्थन चौधरीलाई रहेको छ ।

विश्वासको मत गुमाउँदै नेकपा (एमाले) नेतृत्वको सरकार ढलेपछि यहाँ पनि नयाँ गठबन्धनको सरकार बनेको हो ।