काठमाडौँ, २९ चैत । नेकपा (एकिकृत समाजवादी)का अध्यक्ष माधवकुमार नेपालले नेपालको शिक्षा प्रणालीमा सुधार आवश्यक रहेको बताएका छन् ।

प्रगतिशिल नेपाल राष्ट्रिय शिक्षक संगठनको प्रथम राष्ट्रिय महाधिवेशनको आज यहाँ उद्घाटन गर्दै शिक्षा प्रणालीमा सुधार गर्नका लागि प्रधानमन्त्री र शिक्षा मन्त्री आफैँ अग्रसर हुनुपर्ने जोड दिए ।

पार्टी अध्यक्ष नेपालले व्यक्तिवाद, भ्रष्टाचार प्रवृत्तिलाई निमिट्यान्न पार्नका लागि शिक्षाको महत्वपूर्ण भूमिका हुने भनाइ राखे । उनले दश जोड सम्म निःशुल्क शिक्षा उपलब्ध गराउनुपर्ने भन्दै सीपयुक्त र व्यवहारिक शिक्षा प्रदान गर्नुपर्ने बताए ।

उनले आजकाल नैतिक शिक्षा नहुनाले समाजिक मर्यादा विर्सन थालेको उल्लेख गर्दै विद्यालय तहमा नैतिक शिक्षालाई अनिवार्य बनाउनुपर्ने बताए । उनले जनताले सधै दुई तिहाईको सरकार नदिने भन्दै तत्कालीन नेकपाको दुई तिहाईको सरकार जोगाउन सके मुलुकमा ठुलो परिवर्तन गर्न सकिने बताए ।

मुलुकको परिवर्तनका लागि एउटा मानिसको इच्छा चाहना हुन सकेको खण्डमा त्यो व्यक्तिले परिवर्तन सम्भव हुने समेत उनको भनाइ राखे । उनले नेतृत्व तहमा पुगेका मानिसहरुले आफ्नो जिम्मेवारी कुशलतापूर्वक निभाए मात्र मुलुकका विकास हुने बताए ।

पूर्वप्रधानमन्त्रीसमेत रहेका नेता नेपालले अहिलेको सरकारलाई शिक्षा क्षेत्रलाई उच्चतम प्राथमिकतामा राखेर काम गर्न आफूले निर्देशन दिएको समेत बताए । उनले शैक्षिक प्रणाली सुधार्ने कर्तत्व शिक्षकको रहेको भन्दै आफ्नो विद्यालयमा शिक्षकले राम्रो पढाउनुपर्ने बताए ।

कार्यक्रममा संगठनका अध्यक्ष भीमबहादुर बस्नेतले शिक्षालाई श्रम र सीपसंग जोड्नुपर्ने बताए । महाधिवेशनमा देशभरिबाट तीन सयभन्दा बढी प्रतिनिधि सहभागी एका छन् । महाधिवेशनले नयाँ नेतृत्व समेत चयन गर्ने छ ।