काठमाडौँ, १९ चैत । संस्कृति, पर्यटन तथा नागरिक उड्डयनमन्त्री सुदन किरातीले त्रिभुवन अन्तर्राष्ट्रिय विमानस्थलमा देखिएका समस्या र विकृतिबारे सम्बन्धित निकायका प्रतिनिधिसभा जबाफ मागेका छन् ।

नेपाल नागरिक उड्डयन प्राधिकरणका महानिर्देशक प्रदीप अधिकारी, त्रिभुवन अन्तर्राष्ट्रिय विमानस्थलमा प्रमुख प्रताव तिवारीलगायतका पदाधिकारीसँग छलफल गरेर मन्त्री किरातीले हरेक समस्या र विकृतिबारे जबाफ मागेका हुन् । उनले यात्रुका ब्यागेज चोरिएको घटना सत्य हो कि होइन, हो भने कसरी र कसले चोर्छ भनेर सोधेका छन् ।

मन्त्री किरातीले अरू थुप्रै प्रश्नको जबाफ र नतिजा मागेका छन् । अराइभलमा यात्रु लड्ने विद्युतीय भर्‍याङ के हुँदै छ, कहिलेसम्म बनिसक्छ ? सरसफाइ अभियान के–कस्तो चल्दै छ ? समयमा जहाज उड्दै छ कि छैन ? एयरपोर्टभित्र महँगी नियन्त्रण भयो कि भएन ? ब्रेकबिनाको ट्रली फेर्ने काम कहाँ पुग्यो ? शौचालयभित्र बजिरहेको संगीत किन बन्द भयो ? महिला शौचालयमा स्यानिटरी प्याड राख्ने काम के भयो ? एयरपोर्ट अगाडिको ब्युटिफिकेसन के भयो ? एयरपोर्टभित्र कुकुर र बाँदर कसरी पस्यो ? एयरपोर्टभित्र वाइफाई प्रभावकारी किन चल्दैन ? लगायतका प्रश्न सोधेर मन्त्री किरातीले जबाफ मात्रै नभइ काम चाहिएको बताए ।