नुवाकोट, १३ माघ । भूकम्पले बस्ती जोखिममा परी विस्थापित लच्याङका १४ परिवारलाई राष्ट्रिय पुनःनिर्माण प्राधिकरणले जग्गा गरिद गरी पुनःस्थापना शुरु गरेको छ ।

जोखिमपूर्ण बस्तीका बासिन्दालाई सुरक्षित स्थानमा पुनःस्थापनाका लागि हल्देकालिकाको गोठडाँडामा जग्गा खरिद गरी एकीकृत बस्ती निर्माण शुरु गरिएको पुनःनिर्माण प्राधिकरण जिल्ला समन्वय समितिको सचिवालयका निमित्त प्रमुख वेदप्रसाद गौडेलले जानकारी दिनुभयो ।

उहाँका अनुसार सरकारी अनुदान सहयोगमा चार रोपनी जग्गा खरिद गरी विस्थापितका लागि पुनःनिर्माणअन्तर्गत एकीकृत बस्तीको आवधारणानुसार आवास निर्माण गर्न लागिएको छ । निर्माण गर्न लागिएको एकीकृत बस्ती जिल्लाको पहिलो बस्ती हो ।

विसं २०७२ वैशाख १२ को ‘गोरखाभूकम्प’ले सूर्यगढी गाउँपालिका–१ लच्याङको भीरमुनि टोलका १४ परिवारका लागि प प्राधिकरणले रु १४ लाखमा चार रोपनी जग्गा खरिद गरी सुरक्षित स्थानमा स्थान्तरण गराउन बस्ती निर्माण अघि बढाएको छ । खरिद गरिएको जग्गामा विकासका पूर्वाधार नभएकाले एकीकृत बस्तीमार्फत सुविधा उपलब्ध गराउन लाभग्राहीबाट उपभोक्ता समिति गठन गरी निवेदन माग गर्न लागिएको सचिवालयले जनाएको छ ।

“पुनःनिर्माण कार्यविधिअनुसार कम्तीमा १० परिवार मिलेर एकीकृत बस्ती निर्माणका लागि निवेदन दिएमा पुनःनिर्माण प्राधिकरणले विकासका पूर्वाधारमा एक परिवारका लागि रु चार लाखसम्म लगानी गर्ने प्रावधान छ”, गौडेलले भन्नुभयो, “जग्गा खरिद गरिएको स्थानमा सडक, खानेपानी, विद्युत्लगायतका पूर्वाधार बनाउन स्थानीय तहसँग मिलेर छुट्टै कार्यक्रम ल्याउने योजना छ ।”

भौगर्भिक अध्ययन प्रतिवेदनअनुसार जोखिम बस्तीको सूचीमा विभिन्न बस्तीका ३२१ परिवार सूचीकृत भएकाले स्थान्तरण गर्न सिफारिश गरिएको छ । जोखिमपूर्ण बस्तीमध्ये यसअघि दुई चरणमा तादी–१ उर्लेनीका ७२ मध्ये ५१ परिवारलाई तादी–३ खरानीटारमा जग्गा उपलब्ध गराइएको थियो ।