बुटवल, ११ माघ । नेकपा एमालेका उप–महासचिव एवं रुपन्देही क्षेत्र नम्वर २ का सांसद बिष्णु पौडेलले निर्माण आयोजना समयमा नसक्ने निर्माण कम्पनीलाई कारवाही गर्ने चेतावनी दिनुभएको छ ।

अब बन्ने सरकारका सम्भावित मन्त्री समेत रहेका पौडेलले बुधबार बुटवलको दानव नदीमा दुईवटा मोटरेवल पुलको शिलान्यास गर्दै काम गर्न नसक्नेले आयोजना जिम्मा लिन नहुने भन्दै ठेक्का पाएर काम नगर्नेलाई कडा कारवाही गर्ने चेतावनी दिनुभयो ।

सरकारले हिजो सुकुम्वासी आयोगका जिल्ला अध्यक्ष तोकेकोमा पौडेलले बिरोध जनाउनुभएको छ । सरकार परिवर्तनको समयमा सरकारले गठन गरेको सुकुम्बासी अयोगको कुनै अर्थ नरहेको पौडेलले बताउँदै यो आयोग सुकुम्बासीलाई लालपुर्जा दिनको लागि नबनेको जिकिर समेत गर्नुभयो ।

पौडेलले मजुवा–मैनावगर, मैनावगर–जीतगढी जोड्ने पुलको शिलान्यास गनुभएको हो । हाल काठेपुल रहेको स्थानमा अव पक्की पुल बन्न लागेको हो ।

बज्रगुरु कन्स्ट्रक्सन कम्पनी ललितपुरले १२ करोड ६८ लाख ६४ हजार ठेक्का लिएको पुलको निर्माण ०७७ बैशाख १४ गतेसम्म सक्नुपर्ने सम्झौता रहेको छ । १ सय १३ मिटर लम्बाई र ७ दशमलव ५ मिटर चौडाईको पुल बन्नेछ ।

त्यसैगरी आजै उपमहासचिव विष्णु पौडेलले जितगढी दानव जोड्ने पुलको शिलान्यास गर्नुभएको छ । ११ करोड ३३ लाख ७७ हजारको लागतमा निर्माण हुन लागेको पुलको लम्बाई १ सय १३ मिटर तथा चौडाई ७ दशमवल ५ मिटर हुनेछ । सोजन लुम्बिनीले निर्माणको जिम्मा पाएको कम्पनीले ०७७ जेठ १४ गते पुल निर्माण सम्पन्न गर्नेगरी सम्झौता भएको डिभिजन सडक कार्यालयका प्रमुख कैशाल कुमार श्रेष्ठले बताउनुभयो ।