काठमाडौँ, १८ मंसिर । काठमाडौँ निर्वाचन क्षेत्र नं ८ का वाम गठबन्धनका उम्मेदवारले निर्वाचन प्रचारको अन्तिम दिन आज करिब ६ किलोमिटर पदयात्रा गरेका छन् ।

पदयात्रामा काठमाडौँको स्वयम्भूस्थित बुद्धपार्कबाट इन्द्रचोकसम्मका मतदातासँग भेटघाट गर्नुका साथै उनीहरुलाई निर्वाचन प्रक्रियाबारे पनि जानकारी गराइएको थियो ।

यही मंसिर २१ गते हुने चुनावमा विभिन्न मतपत्रमा मतदान गर्दा आउन सक्ने अन्योल र भ्रमबारे मतदातालाई बुझाइएको थियो । स्थानीय किमडोल, भुइखेल, डल्लु, विष्णुमती, टेकु, जैशीदेवल, कोहिटी, मोईपाट, ओमबहाल, झोछे, वसन्तपुर हुँदै इन्द्रचोकलगायत ठाउँमा पदयात्राका क्रममा मतदाता निकै उत्साहित देखिन्थे ।

नेकपा (एमाले) का उपाध्यक्ष अष्टलक्ष्मी शाक्यले कार्यक्रमको शुभारम्भ गर्दै मुलुकलाई विकसित राष्ट्र बनाउनका लागि वैचारिक रुपले निकट रहेका वाम शक्तिको गठबन्धन गरिएकाले उक्त गठबन्धनलाई जिताउन जनतालाई आग्रह गर्नुभयो ।

यस क्षेत्रमा विश्व सम्पदा सूचीमा सूचीकृत वसन्तपुर दरबार क्षेत्र र स्वयम्भूनाथ चैत्य पर्यटन क्षेत्रको विकासको लागि ठूलो आधार भएको बताउँदै उहाँले कुमारी घर, भीमसेनस्थान, लाखे घर, स्थानीय जात्रा पर्व, सीतापाइला, मञ्जुश्री पार्कलगायत क्षेत्रलाई सम्पदास्थलका रुपमा विकास गर्नुपर्नेमा जोड दिनुभयो । शाक्य सोही निर्वाचन क्षेत्रबाट प्रदेश ‘ख’ को उम्मेदवार हुनुहुन्छ ।

प्रतिनिधिसभाका उम्मेदवार जीवनराम श्रेष्ठले संयुक्त वाम गठबन्धनको चुनावी घोषणापत्रलाई कार्यान्वयन गर्ने प्रतिबद्धता जनाउँदै आफ्नो अग्रसरतामा नेपाल ओलम्पिक कमिटीले डल्लु आवासमा ठूलो कभर्ड हल बनाउने जानकारी गराउनुभयो ।

प्रदेश ‘क’ का उम्मेदवार राजेश शाक्यले स्थानीय क्षेत्रमा देखिएका सडकका खाल्डाको व्यवस्थापन, पिउने पानी तथा ढल निकासको समाधान खोजिने बताउनुभयो ।