दमक, १६ मंसिर । नेकपा एमालेका अध्यक्ष केपी शर्मा ओलीले आफ्ना लागि नभएर आफ्ना सन्ततिको भविष्यका लागि बाम गठबन्धनका उमेदबारलाई मत दिन अपिल गर्नुभएको छ । ओलीका लागि नभएर आफ्ना सन्ततीको भविष्यका लागि बाम गठबन्धनलाई मत दिनुस् ओलीले भने ।

आफ्नो चुनावी क्षेत्र झापाको क्षेत्र नम्वर ५ अन्तर्गत मंगलबारेमा शनिवार आयोजित कोण सभालाई सम्वोधन गर्दै ओलीले अब देश बनाउने कार्यमा सबै सहभागी हुनुपर्नेमा बताउनुभयो । ‘तपाईहरु केपी ओलीलाई होइन, यो देश बनाउने र तपाईका आफ्ना सन्ततिको उज्वल भविष्यका लागि बाम गठबन्धनलाई मत दिनुहोस् ।’ ‘भलै तपाई अरु कुनै पार्टीप्रति झुकाव राख्नु हुन्छ होला, एमालेमै आउनु पर्छ भन्ने छैन, तर मन भए आएपनि हुन्छ स्वागत छ, तर यसपटक देश बनाउने यो महान कार्यमा जोडिनका लागि बाम गठबन्धनका उम्मेदवारलाई मत दिनुहोस्’ ओलीको आग्रह छ ।

अध्यक्ष ओलीले काग्रेसको नेतृत्वमा देश अगाडि बढ्न नसक्ने पटक पटक प्रमाणित भईसकेको तर्क गर्नुभयो । काग्रेसकै सस्थापक नेताहरु गणेशमान सिंह र कृष्णप्रसाद भट्टराईलाई न्याय दिन नसक्ने पार्टीले देशको कसरी भलो गर्न सक्छ ? ओलीको प्रश्न थियो ? ओलीले भन्नुभयो ‘के कांग्रेसमा गणेशमन र कृष्णप्रसाद भट्टराई भन्दा ठूलो कांग्रेस कोही छ र’ ? अध्यक्ष ओली आज विहानैदेखि विभिन्न चुनावी सभामा सहभागी भएर मोरङ, उदयपुर र सुनसरीका सभालाई समेत सम्वोधन गर्ने कार्यक्रम छ ।