अमेरीका ,  ५ जेठ  । मेरिल्याण्डमा २५ बर्षका नेपाली युवाको निधन भएको छ । वाग्लुङ्ग जिल्ला घर भई मेरिल्याण्डमा वस्दै आएका वर्ष २५ का आशिष केसीको निधन भएको मेरिल्याण्ड राज्यको संसदमा प्रतिनिधित्व गर्ने सांसद ह्यारी भण्डारीले जनाएका छन् ।
मेरिल्याण्डको युनिभर्सिटी अफ वाल्टिमोर वाशिङ्गटन मेडिकल सेन्टरले केसीको मृत्युबारे जानकारी दिएको भण्डारीले सामाजिक सञ्जालमार्फत जनाएका हुन् । विगत तीन वर्ष देखि मेरिल्याण्डमा वस्दै आएका आशिष गत शुक्रवार मेरिल्याण्डको रिची हाईवे नजिकको तलाउमा डुबेका थिए । उद्धारकर्ताहरुले उद्धार गरि मेरिल्याण्डको युनिभर्सिटी अफ वाल्टिमोर वाशिङ्गटन मेडिकल सेन्टरमा उपचार गर्ने क्रममा आईतवार उनको निधन भएको हो ।
भण्डारीका अनुशार शुक्रवारको दिन आशिष केसी सहित भतिजा र अन्य साथीहरु समेत मिलेर गएका थिए । तलाउमा डुबेर पानीको मध्य भागमा पुगेपछि आशिष चिच्याएपछि सँगै पुगेका साथीहरु र अन्यले उद्दारको प्रयास गरेका थिए । तर उनीहरु सफल हुन सकेनन् ।

त्यही वीचमा अरु साथीहरुले स्थानीय प्रहरी र उद्दार कर्ताहरुलाई ९११ मा खवर गरेपछि तुरुन्त हेलिकप्टर सहितको टोलीले उहाँको उद्धार गरेका थिए । उद्धारमा रहेको सिपिआर टोलीले अस्पताल लगेका थिए । अस्पतालमा आपतकालीन सेवामा रहेका चिकित्सकहरुले तत्काल उनको उपचारको प्रक्रिया थालनी गरेका थिए ।

डा सारा भायलाले आफूलाई दिनुभएको जानकारी अनुसार तीन पटक सम्म वन्द भएको मुटुको धडकनलाई फर्काउन सफल भएको भण्डारीले जनाएका छन् । सँगै २० घण्टा सम्म शरीरलाई वार्म गराउदै मेकानिकल भेन्टिलेटरमा राखिएको र फेल भएको मृगौला डायलिसस समेत गराएको जनाइएको छ ।

आशिषको अस्पताल पुराउने समयसम्म मुटुको धडकन अवरुद्ध भएको,मृगौला फेल भएको र व्रेनमा समेत गम्भिर असर परिसकेको थियो । उपचारमा संलग्न चिकित्सकहरुले उच्च प्रकारको मेडिकेशन चलाएर व्रेन वेभ मनिटर मार्फत मस्तिष्कको जाँच गर्दा अक्सिजनको कमी भएको र मृगौला समेत फेल भईसकेको थियो ।

उपचारमा विशेषज्ञ चिकित्सकहरुको टोली संभव भए सम्मको उपचार गरेका थिए । डा सारा भायलाको टिमले अन्तिमसम्म गरेको प्रयासको उच्च प्रशंसा गर्दे उनीहरुको सेवा भावको लागि भण्डारीले धन्यवाद व्यक्त गरेका छन् ।

भण्डारीले भनेका छन् (‘यसरी सयौ सपनाका साथ आप्रवासीको रुपमा अमेरिका आएर अल्पायुमा दिवंगत हुनुभएका केसीको निधनको खवरले हामी अत्यन्तै मर्माहत भएका छौं । साथै उहाँको आत्माको चीरशान्तिको कामना गर्दछु ।’

यस दुखद क्षणको वारेमा नेपालको स्थानीय समय अनुसार सोमवार विहान नेपालमा रहनुभएका पिता मातालाई समेतलाई अवगत गराइएको छ । यस दुखद घडीमा अमेरिका र नेपालमा रहेका आशिषका परिवारजन साथीहरुमा धैर्य धारण गर्ने शक्तिका लागि कामना गर्दे आवश्यक प्रक्रिया पूरा गरी अन्तिम संस्कार सम्पन्न गर्नका लागि परिवारका सदस्यहरुको समन्वय र स्थानीय संघसंस्थाका प्रतिनिधीसँग सहकार्य गरेर व्यवस्थापन गर्ने भण्डारीले जनाएका छन् ।