काठमाडौं, १९ चैत्र । चीनको तिब्बत स्वायत्त प्रदेशमा रहेको गुड विल फाउन्डेशन नामक संस्थाले नेपाललाई ५० हजार थान मास्क सहयोग गरेको छ ।

गुडविल फाउन्डेसनले आज चीनको गञ्जाओस्थित नेपाली महावाणिज्य दूताबासलाई ५० हजार थान डिस्पोजेवल मेडिकल मास्क हस्तान्तरण गरेको हो । गुडविल फाउन्डेशनका अध्यक्ष मा सिजियानले नेपाली महावाणिज्य दूताबासका उपमहावाणिज्य दूत कुञ्जन साहलाई आज हस्तान्तरण गर्नुभएको हो । गुडविल फाउन्डेशनबाट नेपाल मिडिया सोसाइटीका अध्यक्ष शुभशंकर कँडेलका नाममा पठाइएका यी सामग्री काठमाडौं आइपुगेपछि नेपाल सरकारलाई औपचारिक रुपमा हस्तान्तरण गरिनेछ ।

त्यसक्रममा, फाउन्डेशन अध्यक्ष मा ले कोरोना भाइरसको संक्रमणमा विजय प्राप्त गरेको चीनको नागरिकको तर्फबाट आफ्नो सबैभन्दा असल छिमेकी राष्ट्रलाई सहयोग गर्न पाउंदा खुशी भएको बताउनुभयो । मा ले उहाँले कोरोना भाइरसको संक्रमण फैलिन नदिन सफलता प्राप्त गर्ने विश्वास व्यक्त गर्नुभयो । उहाँले गुडविल फाउन्डेसन तिब्बतको तर्फबाट भोलिका दिनमा पनि नेपाललाई सहयोग जारी राख्ने प्रतिवद्धता जनाउनुभयो ।

नेपाली महावाणिज्य दूतबासका उपमहावाणिज्य दूत कुञ्जन साहले नेपाललाई अति आवश्यक मास्क सहयोग गरेकोमा गुडविल फाउन्डेशनलाई धन्यवाद दिनुभयो । साहले कोरोना भाइरस महामारी विरुद्धको युद्धमा दुवै देश मिलेर अघि बढ्ने बताउनुभयो ।

गुडविल फाउन्डेशनले नेपालका युवालाई स्वरोगजार तालिम प्रदान गर्दै आएको छ भने सरकारी कर्मचारीहरुलाई चिनिया भाषामा कम्प्युटर संचालनको प्रशिक्षण दिंदै आएको छ । फाउन्डेशनले नेपालका सामुदायिक विद्यालयहरुलाई पनि सहयोग गर्दैआएको छ ।