काठमाडौं, १९ भदौ । संस्कृति र सम्पदासँग सम्बन्धित विज्ञहरुले सम्पदाको संरक्षण गर्न सरकारले सक्रियता नदेखाएको आरोप लगाएका छन् ।
एबीसी टेलिभिजनको ११ औं वार्षिकोत्सवका अवसरमा आयोजित ‘विकास वर्ष २०७६’ मा बोल्दै उनीहरुले सरकारले सक्रियता देखाउन सकेमात्र अरु पक्षले गरेको पहलकदमी प्रभावकारी बन्न सक्नेमा जोड दिए । राष्ट्रिय अभिलेखालयका पूर्व प्रमुख भीम नेपालले सरकार संस्कृति र सम्पदाको पुनर्निर्माणमा उदासिन भएको बताउनुभयो ।
उहाँले सरकारसँग साधन र स्रोत प्रशस्तै मात्रामा भएपनि काम गर्नेतर्फ चासो नदेखाएको आरोप लगाउनुभयो । उहाँले सरकारले सन् २०२० लाई पर्यटक वर्ष मनाउने घोषणा गरेपनि पर्यटकलाई आकर्षित गर्ने कुनैपनि योजना सरकारसँग नभएको भन्दै सरकारको कार्यशैलीको आलोचना गर्नुभयो । नेपाल प्राज्ञिक अनुसन्धान केन्द्रका अध्यक्ष डा. भक्त राईले सरकारसँग समन्वय गरेर आफूँहरु काम गर्न तयार भएपनि सरकारले यस क्षेत्रमा बसेर काम गर्नेसँग समन्वय गर्न नचाहेको आरोप लगाउनुभयो । राइले सरकारका हरेक नीति र कार्यक्रम प्रभावकारी भएपनि कार्यान्वयनमा समस्या देखिएको टिप्पणी गर्नुभयो ।
ठमेल –कमलपोखरी पुनस्र्थापना अभियानका संयोजक भागवत नरसिंह प्रधानले उपत्यकाका धेरै सम्पदा पुननिर्माणको पर्खाइमा रहेको बताउनुभयो । भइरहेका सम्पदालाई नष्ट गरेर घर र भवन बनाउने काम भएको भन्दै उहाँले आफूहरु संरक्षण र संवद्र्धनमा लागिरहेको स्पष्ट पार्नुभयो ।
पुरातत्व विभागका प्रवक्ता रामबहादुर कुँवरले सरकारले आफ्नो ठाउँबाट जिम्मेवारी निर्वाह गरिरहेको बताउनुभयो । प्रवक्ता कुँवरले सरकारले प्राथमिकताका आधारमा सम्पदाको निर्माण र व्यवस्थापन गरिरहेकोमा जोड दिनुभयो । उहाँले सबैको सहयोग र समन्वय भएको खण्डमा भूकम्पपछिको पुननिर्माण गर्न कुनै समस्या नहुने तर्क गर्नुभयो ।
प्रतिक्रिया दिनुहोस्