काठमाडौं, ८ भदौ । प्रहरीको तथ्यांकअनुसार दैनिक सरदर १५ नेपालीले आत्महत्या गर्ने गरेका छन् । आत्महत्या गर्नेमा ५६ प्रतिशतको उमेरसमूह १९ देखि ४० वर्षको हुने गरेको प्रहरीको तथ्यांक छ ।
पारिवारिक, आर्थिक, सामाजिक लगायत विभिन्न कारणवश मानिसहरु पहिले डिप्रेसनमा पुग्ने गरेको र विस्तारै आत्महत्या गर्ने गरेको विभिन्न अध्ययन देखाएको छ ।
पछिल्ला चार वर्षमा मात्रै मुलुकभर २० हजार नौ ६७ जनाले आत्महत्या गरेको प्रहरीको तथ्यांक छ । यो संख्या आपराधिक क्रियाकलापबाट हुने कुल मृत्युको ४५ प्रतिशत हो । कोही प्रेममा धोका पाएको पीडा सहन नसकेर झुन्डिएका छन् भने कसैले भ्रष्टाचार आरोप खेप्न नसकेर पनि विष सेवन गरेका छन् । आत्महत्या गर्ने ५६ प्रतिशत युवा हुने गरेको नेपाल प्रहरीको तथ्यांकले देखाएको छ ।
तथ्यांकअनुसार दैनिक १५ नेपालीले आत्महत्या गर्ने गरेका छन् जसमा कुलमध्ये आत्महत्यामा एक प्रतिशत हत्या ‘दुरुत्साहन’बाट हुने गरेको छ । ७५ प्रतिशत आत्महत्या झुन्डिएर हुने गरेको छ । विष सेवनबाट आत्महत्या गर्ने दर २३ प्रतिशत छ । बाँकी एक प्रतिशत आत्महत्या भने अन्य कारणबाट हुने गरेको प्रहरीको तथ्यांकले देखाएको छ । आर्थिक, सामाजिक र राजनीतिक कारणवश समाजमा यस्ता विभिन्न खाले अप्रिय घट्ना बढिरहेको एक विज्ञ बताउंछन् ।
विभिन्न खाले समस्या, तनाव, चिन्तन, यातना लगायतका कारणबाट मानिसहरुमा डिप्रेसनको समस्या बढिरहेको छ । जसकारण पनि मानिसहरुले आत्महत्या गरिरहेका छन् । डिप्रेसनका बिरामीहरुले आफ्नै बच्चाको हत्या गरेर आफू पनि आत्महत्या गरेको भेटाईएको मनोचिकित्सक डा. निराकार मान श्रेष्ठ बताउंछन् ।
पछिल्लो तीन सातामा मात्रै सरकारका चार कर्मचारीले आत्महत्या गरेका छन् । निजामती सेवाका तीन नायब सुब्बा र एक नेपाल प्रहरीका जवान छन् । हत्या, आत्महत्या लगायत सामाजका अपराधिक गतिविधिहरु अर्थ, समाज र परिवारसँग जोडिएको देखिन्छ । मानिसको मानसिक अवस्था सन्तुलनमा नरहेको कारण पनि आत्महत्या, जघन्य हत्या तथा अपराधिक घटनाहरु हुने गर्छन् भन्ने बुझाई पनि हाम्रो समाजमा छ । तर, मनोचिकित्सक श्रेष्ठका अनुसार मानसिक राग लागेका भन्दा नलागेकाबाट अपराध हुने सम्भावना अधिक हुन्छ । मानसिक रोग नलागेकाहरुले आफ्नो सुरक्षा सहित योजना बनाएर अपराध गर्छन् जुन मानसिक रोगीहरुले गर्न सक्दैनन् । जाँडरक्सी र कुलतमा फसेकाहरु, एक्कासी आवेगमा आएर बोल्नेहरु, अरुलाई त्यत्तिकै शंकाको दृष्टिले हेर्नेहरु र छारे रोग लागेकाहरु मध्येबाट पनि हत्याको घटना घट्न सक्ने श्रेष्ठ विश्लेषण गर्छन् ।
लामो अवधि परिवारसँग अलग रहने, मानसिक, आर्थिक, सामाजिक तथा शारीरिक आवश्यकता पूरा गर्न नसक्ने र कामको अत्याधिक चाप आदिकाकारण डिप्रेसन हुन सक्ने चिकित्सकहरुले बताउँदै आएका छन् । जीवनमा आएका समस्याहरुलाई उचित व्यवस्थापन गर्न नसक्दा मानिसहरुले आत्महत्या गरिरहेका छन् । तसर्थ, डिप्रेसनलाई समयमै उपचार गर्न सके र आफ्ना समस्याहरुलाई स्वस्थ् ढंगबाट व्यवस्थापन गर्न सकेको खण्डमा आत्महत्या कम गर्न सकिएला ।
प्रतिक्रिया दिनुहोस्