काठमाडौं, २ भदौ । आइतबारको प्रतिनिधि सभाको बैठकलाई सम्बोधन गर्दै प्रधानमन्त्री केपी शर्मा ओलीले लोकतन्त्रको रक्षा र देशको आर्थिक प्रगतिको निम्ति सबै व्यक्ति, पार्टी र समुदाय एकजुट भएर लाग्नुपर्ने बताएका छन् । शान्ति सुरक्षाको ग्यारेन्टी गर्दै देशबाट गरिबी र पछौटेपन हटाउँदै सरकार सुशासन र विकासमा केन्द्रीत हुने उनको भनाइ छ ।

प्रतिनिधी सभाको आइतबारको बैठकमा प्रधानमन्त्री केपी शर्मा ओलीले सम्बोधन गरेका छन् । प्रधानमन्त्री ओलीले अवरुद्ध संसद खुलेकोमा खुशी व्यक्त गर्दै बनाउन बाँकी रहेका कानुन संसदको चालु अधिवेशनले छिटोभन्दा छिटो निर्माण गर्नुपर्नेमा जोड दिए । सरकार लोकतन्त्रको निम्ति त्याग र बलिदान गरेर आएकाहरुले बनाएको भन्दै सरकारले लोकतन्त्रलाई संरक्षण गर्दै अझ सुदृढ बनाउनुपर्ने उनको भनाइ छ । लोकतन्त्र र संविधानको बर्खिलापमा केही परिवर्तन विरोधी तत्व लागि परिरहेकोले सरकार कमजोर रहेको नठान्न उनले चुनौति दिए ।

परिवर्तनलाई उल्ट्याउने बेमौसमी बाजा नबजाउन सुझाउँदै प्रधानमन्त्री ओलीले त्यसको लागि सरकार दह्रो रहेको बताए । विकास आयोजनाका काममा देखिएको समस्या समाधानका लागि सरकार गम्भिर रहेको उनको भनाइ छ । आर्थिक वृद्धिदर इतिहासकै उच्च हासिल भएकोले आगामी वर्षहरुमा निरन्तर वृद्धि गरिदै लाने प्रधानमन्त्री ओलीले बताए । सरकारले गत वर्ष आधार वर्षको रुपमा लिएकोले यस वर्ष कानुन, संरचना, शक्ति र सामथ्र्यको विन्यास टुङ्ग्याउने उनको भनाइ छ । स्वास्थ्य र शिक्षामा निकै परिवर्तन आएको सुनाउदै प्रधानमन्त्री ओलीले अब सरकार सुशासन र विकासमा केन्द्रीत हुने बताए । जनतालाई शान्तिसुरक्षाको ग्यारेन्टी गर्दै पछौटेपन र गरिबीबाट उन्मुक्ति दिन सरकार जागरुक रहेको उनको भनाइ छ । अपराध नियन्त्रणमा सरकारले प्रभावकारी कदम चालेको उल्लेख गर्दै सम्पति सुद्धिकरण, राजश्व चुहावट लगायतका विषयमा दोषीलाई कारबाही गर्न सरकार प्रतिबद्ध रहेको उनको भनाइ छ ।

अतिक्रमित सार्वजनिक जग्गालाई सरकारको नियन्त्रणमा ल्याउन कडा कदम चालिएको, सार्वजनिक र गुठी जग्गाको अपचलन गर्नेलाई उच्च स्तरीय समिति बनाएर कारबाही प्रक्रिया अगाडी बढाइएको, सत्य निरुपण तथा मेलमिलाप आयोग र बेपत्ता छानविन सम्बन्धी आयोगको गठन पनि यसै हप्ताभित्र भइसक्ने प्रधानमन्त्री ओलीले जानकारी दिए । संघ, प्रदेश र स्थानीय तहले आ–आफ्नो जिम्मेवारी पुरा गर्दै संघीयता कार्यान्वयनमा अघि बढेको र सबै प्रदेश विच तालमेल, साधन स्रोतको बाँडफाँडमा सरकारले उचित व्यवस्थापन गर्ने उनको भनाइ छ । सार्वजनिक खरिदको क्षेत्रमा रहेको समस्या समाधानका लागि कानुन बनाइरहेको उनले बताए ।

देशभर बाढी, पहिरो र डुबानले पुराएको क्षतीमा सरकारको ध्यान पुगेको प्रधानमन्त्री ओलीले बताए । पिडितलाई पुर्नस्थापनाका निम्ति सरकार लागिरहेको उनको भनाइ छ । चैत्र १७ गते बारा, पर्सा र रौतहटमा हावाहुरीले गरेको क्षतीमा पुर्नस्थापनाका निम्ति नेपाली सेनाले घरहरु निर्माण गर्दै गरेको उल्लेख गर्दै यही महिनाभित्रै ८६९ घर निर्माण गरिसक्ने जानकारी दिए । प्रधानमन्त्री ओलीले लोकतन्त्रको रक्षा र देशको आर्थिक उन्नतीको निम्ति सबै व्यक्ति, पार्टी र समुदाय एक हुनलाई आग्रह गरे ।