सिंहदरबार दक्षिण गेटको पास व्यवस्थापन कमजोर, सर्वसाधारणलाई सिंहदरबार छिर्न मुस्किल ( भिडियोसहित)



काठमाडौँ, २७ साउन । सर्वसाधारण प्रवेश गर्ने सिंहदरबार दक्षिण गेटमा व्यवस्थित रुपले गेट पास वितरण गर्न नसकेको भन्दै सम्बन्धित निकायलाई सर्वसाधारणले ध्यानाकर्षण गराएका छन् । प्रविधिको युगमा पनि परम्परागत रुपमा पास वितरण गरि सर्वसाधारणलाई सास्ति दिएको भन्दै उनीहरुले असन्तुष्टि व्यक्त गरेका छन् ।

सिंहदरबार परिसर । देशकै कार्यपालिका र व्यवस्थापिका रहेको महत्वपूर्ण क्षेत्र । सरकारको केन्द्रीय सचिवालय रहेको स्थान । प्रधानमन्त्री कार्यालयदेखि सबै मन्त्रालयहरु एवं संसद सचिवालय रहेको ठाउं अर्थात, सिंगो देश संचालन सिंहदरबारले गर्छ ।

परिसरभित्र सबै मन्त्रालयसहित अन्य विभिन्न सरकारी निकायका गरी करिब ५० वटा भन्दा बढी कार्यालयहरु छन् । यसले गर्दा स्वभाविक रुपमा यहाँ सर्वसाधारणदेखि सरोकारवाला व्यक्तिहरुको भिडभाड हुने नै भयो । तर, सर्वसाधारणलाई सिंहदरबार पस्न भने अझै सास्ति हुने गरेको छ । करिब ७ हजार ५ सय कर्मचारी नियमित सिंहदरबार प्रवेश गर्छन् । मोटरसाइकल करिब ३ हजार, चारपांग्रे गाडी ८०० प्रवेश गर्छन । दैनिक करिब १८ सय देखि २५०० व्यक्तिहरु मन्त्रालय एवं कार्यालयहरुले पठाएको प्रवेश पास मार्फत सिंहदरबार दक्षिण गेट हुंदै प्रवेश गर्ने गरेका छन् ।

तर दक्षिण गेटमा रहेका पाँचवटा झ्यालबाट प्रवेश पास वितरण गरिएको भएपनि प्रभावकारी पास व्यवस्थापन नहुंदा सर्वसाधारणले सास्ती भोग्नु परेको छ । विभिन्न मन्त्रालयले पास पठाउँछन् । भिड नियन्त्रण गर्न र वितरण प्रणालीलाई प्रभावकारी बनाउन भन्दै पास आएका व्यक्तिहरुको नाम डिस्प्ले बोर्डमा देखाउन खोजिएको छ । तर, दुइ वटा मात्र डिस्प्ले चलेका छन् । तर भिड भने नियन्त्रण हुन सकेको छैन । सर्वसाधारणले सिंहदरबार प्रवेशद्धार नै प्रभावकारी रुपले सञ्चालन हुन नसकेकोमा असन्तुष्टि व्यक्त गरेका छन् ।

डिस्प्ले बोर्ड निरन्तर चल्दैनन् । प्रवेश पास वितरणलाई प्रविधिमैत्री बनाउने सिंहदरबार व्यवस्थापनको काम असफल भएको छ । त्यसो त सिंहदरबारभित्रका मन्त्रालयले सर्वसाधारणलाई पास पठाउन पनि कुनै विधि, पद्धती बनाएका छैनन् । क–कसलाई पास पठाइयो र ति व्यक्ति आए आएनन् भनेर कतै हाजिरी हुनेपनि हुंदैन । मन्त्रालयहरुको कुनै एक शाखा अथवा कोठाबाट मात्र पास जाने होइन, जुनकुनै कोठा जुनकुनै शाखाबाट एउटा फोनको भरमा पास जाने गरेको छ । यसले गर्दा सिंहदरबारमा अनावश्यक मान्छेको समेत भिडभाड बढी नै हुनेगरेको छ । तर, कृषि तथा पशुपन्छी विकास मन्त्रालयका प्रवक्ता तेजबहादुर सुवेदी असम्बन्धित व्यक्तिलाई सिंहदरबार प्रवेशमा सिफारिस नगरिएको बताउँछन् ।

सिंहदरबार प्रवेशका निम्ति मन्त्रालयले नागरिकता, लाइसेन्स, पासपोर्ट, मतदाता परिचयपत्र, राष्ट्रिय परिचयपत्रको आधारमा चिट दिने गर्छ । चिट प्रहरीले हेरेपछि मात्र प्रवेश पाइन्छ । पालो कुर्नपर्ने भएकोले कागजात भेरिफाई गर्न निकै समय लाग्छ । यसलाई अझ प्रविधिमैत्री र प्रभावकारी बनाउने भनिएको भएपनि हालसम्म हुन सकेको छैन ।

सिंहदरबारको सुरक्षा गृह मन्त्रालयले हेरेको भएपनि प्रविधिमैत्री बनाउन सिंहदरबार भित्रका सबै कार्यालयहरु उत्तिकै जिम्मेवार हुनुपर्ने भएकोले व्यवस्थित बनाउन नसकेको गृह मन्त्रालयका प्रवक्ता रामकृष्ण सुवेदी बताउँछन् । भविष्यमा प्रविधिमैत्री बनाउँदै लगिने सुवेदीको भनाइ छ ।

देशको केन्द्रविन्दु सिंहदरबार भित्र सेवाग्राहीलाई दिने सेवाको त यस्तो अस्तव्यस्तता छ भने अन्यत्र ठाउँमा कस्तो होला सहजै अनुमान लगाउन सकिन्छ । सर्वसाधारणलाई प्रभावकारी सेवा दिन सम्बन्धित निकाय चनाखो हुनुपर्छ ।

    Comment Here!


सम्बन्धित समाचार

View All