सप्तरी, २९ फागुन । पूर्वपश्चिम राजमार्ग अन्तरगत सप्तरीको सुरुङ्गा नगरपालिका ५ कुशहा पुलमा बुधबार बिहान तिर्थ यात्रु बोकेको बस र मोटरसाइकल ठोकिदा घटनास्थलमै दुई जनाको मृत्यु भएको छ ।

उदयपुरको रामपुर ठोक्सिलाबाट जनकपुरका लागि तिर्थ यात्री बोकेर आउदै गरेको को १ ख ४९३४ नम्वरको यात्रुबहाक बसले बिपरित दिशाबाट आउदै गरेको को. ३४ प.६४२५ नम्वरको मोटरसाईकललाई ठक्कर दिदा बस अनियन्त्रित भई पल्टिएर सो दुर्घटना भएको सप्तरी प्रहरीले जनाएको छ ।

मृत्यु हुनेमा सोही नगरपालिका निवासी मोटरसाईकल चालक ३५ वर्षीय रामे पासवान र पछाडी सवार ५० वर्षीय मो. मजलुम रहेको प्रहरीले जनाएको छ । प्रहरीका अनुसार बस र मोटरसाइकल ठोकिएपछि बस अनियन्त्रित सोही मोटरसाइकलमाथी पल्टिएको हो । सो दुर्घटनामा बसमा सवार एक दर्जन तिर्थ यात्रुहरु समेत घाइते भएका छन् ।

घाइते यात्रुहरुलाई लहानस्थित मेडिकल आस्पतालमा उपचारका लागि पठाएको तथा मृतक दुबैको शवलाई राजविराजस्थित गजेन्द्र नारायण सिंह अस्पतालमा पोष्टमार्टमका लागि पठाइएको जिल्ला प्रहरी कार्यालय सप्तरीले जनाएको छ । यता बस चालकलाई ईलाका प्रहरी कार्यालय कडोरवाना सप्तरीले नियन्त्रणमा लिएको छ ।