ओखलढुङ्गा । ओखलढुङ्गाबाट निर्वाचित प्रतिनिधि सभा सदस्य विश्वराज पोखरेलले चण्डेश्वरी माध्यमिक विद्यालयका प्रधानाध्यापक सन्तबहादुर मगरसँग भएको विवादबारे आलोचना बढेपछि सार्वजनिक रूपमा माफी मागेका छन्। शनिबार उनले विज्ञप्ति जारी गर्दै उक्त घटनाप्रति क्षमायाचना व्यक्त गरेका हुन् ।

संघीय संसदको बैठक स्थगित भएका बेला आफ्नो निर्वाचन क्षेत्रमा नागरिकसँग भेटघाट गर्ने क्रममा वैशाख ९ गते खिजिदेम्बा गाउँपालिका–२ स्थित चण्डेश्वरी माध्यमिक विद्यालयमा पुगेका बेला विवाद उत्पन्न भएको उनले बताएका छन्। सो घटनाबारे उनले स्पष्टीकरण दिँदै सामाजिक सञ्जालमा फैलिएको भिडियोले घटनाको पूर्ण सन्दर्भ नदेखाई आंशिक रूपमा मात्र प्रस्तुत गरिएको दाबी गरेका छन्। अपूर्ण जानकारीका कारण विवाद बढेकोमा उनले खेद व्यक्त गरेका छन्।

यद्यपि, सार्वजनिक जीवनमा रहेका व्यक्तिले अझ संयमित र मर्यादित व्यवहार देखाउनुपर्ने स्वीकार गर्दै उनले आफूबाट थप धैर्य देखिनुपर्ने बताएका छन्। “यस घटनाले पार्टी, समर्थक, विद्यालय परिवार, स्थानीय समुदाय र आम जनतामा चोट पुगेकोमा म क्षमाप्रार्थी छु,” उनले भनेका छन्।

घटनाको दिन गाउँमा सांसद आउने खबरले विद्यालयमा उत्साह देखिएको थियो। प्रधानाध्यापक मगरसहित शिक्षक तथा कर्मचारी बिहानैदेखि तयारीमा जुटेका थिए। विद्यालयका समस्या र मागहरू लिखित रूपमा पेश गर्ने र सांसदको भव्य स्वागत गर्ने योजना थियो। स्वागतका लागि खादा, माला र कुर्सीको व्यवस्था गरिएको थियो भने स्थानीयबासी बाजागाजासहित सांसदलाई विद्यालयसम्म ल्याएका थिए।

तर, सांसद विद्यालय पुग्दा प्रधानाध्यापक र केही कर्मचारीहरू कार्यालयभित्र आवश्यक कागजात तयार पार्न व्यस्त थिए। बाहिर रहेका कर्मचारीहरूले उनलाई बस्न आग्रह गरे पनि भित्रबाट कोही नआउँदै उनी असन्तुष्ट हुँदै फर्किन लागेका थिए। त्यसपछि हतारिँदै बाहिर आएका प्रधानाध्यापक मगरले स्वागतमा ढिलाइ भएको भन्दै क्षमा मागेका थिए।

तर, उक्त अवस्थामा सांसद पोखरेलले आफूलाई उचित सम्मान नगरिएको भन्दै प्रधानाध्यापकलाई हप्काएका थिए। उनले आफ्नो विगतको सेवाकाल र पदको उल्लेख गर्दै असन्तुष्टि व्यक्त गरेका थिए। साथै, विद्यालय प्रशासनलाई खेद प्रस्ताव पारित गर्न दबाब दिएको भिडियो सामाजिक सञ्जालमा भाइरल भएको थियो।

चारैतिरबाट आलोचना भएपछि उनले अन्ततः सार्वजनिक रूपमा माफी मागेका हुन्।