काठमाडौं, १ फागुन । सरकारले देश भित्रै विभिन्न अवसरको सिर्जना गर्ने उद्देश्यसहित बुधबार प्रधानमन्त्री रोजगार कार्यक्रमको घोषणा गर्दैछ ।

पाँच वर्षभित्रमा बाध्यताले वैदेशिक रोजगारीमा जानु पर्ने अवस्था अन्त्य गर्ने घोषणा गरेको सरकारले प्रधानमन्त्री रोजगार कार्यक्रम ल्याउन लागेको हो ।

प्रधानमन्त्री रोजगार कार्यक्रम कार्यान्वयनका लागि हरेक स्थानीय तहमा रहने रोजगार सेवा केन्द्रका लागि रोजगार संयोजकको भर्ना प्रक्रिया चलिरहेको छ ।

प्रधानमन्त्री रोजगार कार्यक्रमको औपचारिक घोषणाका लागि बुधबार सरकारले विशेष कार्यक्रम गर्दैछ । दिउँसो १२ बजे हुने कार्यक्रमका बिच प्रधानमन्त्री केपी ओलीले यसको घोषणा गर्नेछन् ।

ओली सरकारले ‘हाम्रो भविष्य, हाम्रो सरकार’ नारा दिएर बेरोजगारी सरकारको मुख्य चुनौती रहेको र यसविरुद्धको एक ऐतिहासिक घोषणा प्रधानमन्त्री रोजगार कार्यक्रम रहेको जनाएको छ ।

कार्यक्रम कार्यान्वयनका लागि ऐन नियमहरु तयार भइसकेको अब कार्यान्वयन गर्न समस्या नभएको श्रम मन्त्री गोकर्ण बिष्टले यसअघि नै बताएका छन् । यो कार्यक्रम बेरोजगारी समस्या हल गर्न कोशेढुंगा साबित हुने दाबी गरिएको छ ।

सरकारको उद्देश्य बेरोजगार भत्ता दिनु नभएर रोजगारी दिनु भएकाले सकेसम्म सबैलाई रोजगारी दिने गरी अगाडि बढ्ने जनाइएको छ । प्रधानमन्त्री रोजगार कार्यक्रमले काम खोज्ने र कामदार खोज्नलाई सूचिकृत गराउने छ ।

फागुन २० गतेसम्ममा रोजगार संयोजक नियुक्त गरिने प्रधानमन्त्री रोजगार कार्यक्रमका प्रमुख श्रम रोजगार तथा सामाजिक सुरक्षा मन्त्रालयका सहसचिव प्रकाश दाहालले जानकारी दिए ।