काठमाडौं , १० माघ ।  ‘टुपोलेभ टु–२२ एम ३’ नामक सुपरसोनिक बम्बर रुसको उत्तरपश्चिमी क्षेत्रमा दुर्घटनाग्रस्त भएको बताइएको छ । अवतरण गर्ने क्रममा उक्त लामो रेन्जको बम्बर दुर्घटनामा परेको रुसको राष्ट्रिय संचारले जनाएको हो । सो लडाकू विमानमा कमान्डर, को–पाइलट, नेभिगेटर र अपरेटर गरि चार अधिकारी सवार थिए जसमध्ये तीनजनाको मृत्यु भएको बताइएको छ ।

दुर्घटनाको प्रमुख कारणबारे पक्का प्रमाण फेला नपर्दा, खराब मौसमका कारण त्यस्तो भएको हुन सक्ने अनुमान गरिएको छ । टुपोलेभ टु–२२ एम३ लामो रेन्जको सुपरसोनिक लडाकू विमान हो जसलाई रुसमा पहिलोपटक १९८० को दशकमा सेवामा ल्याइएको थियो । जेन्स बाइ आइएचएस मार्किटका अनुसार सो विमान आणविक प्रहार गर्ने क्षमतायुक्त बम्बर हो र सामान्य हमला गर्न अनि जहाजी मिसनमा समेत काम गर्न सक्छ ।

राष्ट्रपति पुटिनले गत वर्ष मात्र रुसले नाटोका प्रतिरक्षात्मक प्रणालीलाई मात दिने नयाँ हतियार सार्वजानिक गर्ने घोषणा गरेका थिए । रुसका नयाँ हाइपरसोनिक मिसाइल प्रणालीका अगाडि जुनसुकै प्रतिरक्षात्मक हतियार पनि बेकार साबित हुने उनको दाबी थियो । गत डिसेम्बर २६ मा गरिएको मिसाइल परीक्षणपछि पनि फेरि पुटिनले अमेरिकाका अगाडि रुस असंवेदनशील रहेको ठहर गरेका हुन् । उनले भनेका थिए , ‘नयाँ किसिमको रणनीतिक हतियार प्राप्त गर्ने रुस पहिलो मुलुक हो जसले दशकौँसम्म राज्य र देशका जनताको सुरक्षा सुनिश्चित गर्नेछ । ’

यसरी रुसद्वारा निर्माण गरिएको एभान्गार्ड हाइपरसोनिक प्रणाली दक्षिणपश्चिम स्थित डोमबारोभस्की सैन्य बेसबाट परीक्षण गरिएको थियो । दुर्घटनामा परेको टुपोलेभ मिसाइलले भने घटनाका क्रममा कुनै हतियार नबोकेको बताइएको छ । – सिएनएन