विराटनगर, ३ माघ । विराटनगर महानगरपालिकाका प्रमुख भीम पराजुलीले नगर क्षेत्रमा भइरहेका विकास निर्माणको अनुगमन गर्न लाग्नु भएको छ ।
शुरु भएका विकास निर्माणका काम समयमै सम्पन्न गर्न र भइरहेका कामको गुणस्तर जान्नका लागि अनुगमनलाई तीव्रता दिनु भएको हो ।
अहिले नगर क्षेत्रमा दर्जनौ सडक, ढलसहित नालाका काम र कालोपत्रे गर्ने काम सञ्चालित छन् ।
विकासका काममा बिजुलीको खम्बा मुख्य बाधकका रुपमा देखा परेको प्रमुख पराजुलीले आज अनुगमन गर्दै बताउनुभयो । कतिपय स्थानमा जग्गा विवादले समेत सडक निर्माणमा ढिलाइ भइरहेको उहाँको भनाइ थियो । विराटनगरको विकास क्षेत्रीय विकास परियोजनाअन्तर्गत भइरहेको बताइएको छ ।
विराटनगर – ७ को शहीद मैदानछेउको सडक, नेपाल टेलिकमछेउको गोहिलीमार्ग, मोतीरामचोक छेउबाट जोडिएको बाटो, वडा नं ८ इन्द्रमार्गको मधुमारापथ, भगवतीमार्ग, व्यासाश्रम मार्ग, भक्तिमार्ग, भगवतीचोक, धरमबाद रोड, वडा नं ९ को चुलाचुलीमार्ग, न्यूरोमार्ग र वडा नं १० को शाहीमार्ग, प्रतिभामार्ग, सोमबारे हाट छेउलगायत विभिन्न स्थानमा बनिरहेका सडक निर्माण कहिले सकिन्छ भनेर महानगर प्रमुख पराजुलीले आयोजनाका परामर्शदाता र इञ्जिनीयरसँग समयसीमा किटानी लिनुभएको छ ।
प्रमुख पराजुलीले विकासमा अब ढिलाइ गर्न नहुने भएकाले निर्माण व्यवसायीलाई सक्रियता देखाउन निर्देशन पनि दिनुभयो । अनुगमनका क्रममा कन्सलटेण्ट इञ्जिनीयर हरेकृष्ण मण्डलले नगर क्षेत्रका अधिकांश सडक निर्माणको अन्तिम अवस्थामा रहेको जानकारी दिनुभयो ।
अनुगमनमा वडाध्यक्ष निश्चल अर्याल, मधुबाबु तिवारी, विश्वनाथ भगत र माधवराज वाग्ले तथा इञ्जिनीयर भरत न्यौपाने र घनश्याम काफ्लेलगायतको सहभागिता थियो ।
प्रतिक्रिया दिनुहोस्