चितवन,३० पुस । प्रदेश नम्बर ३ को चितवनमा विकास निर्माण र आर्थिक गतिविधि फस्टाएसँगै भ्रष्टाचारजन्य क्रियाकलापमा पनि वृद्धि भएको छ ।
अख्तियार दुरुपयोग अनुसन्धान आयोगको कार्यालय हेटौंडाले जारी गरेको यस आर्थिक वर्षको पुस मसान्तसम्मको तथ्यांक अनुसार काठमाडौं बाहिर सबैभन्दा धेरै भ्रष्टाचार भएका जिल्लाहरुको सूचिमा चितवन दोस्रो नम्बरमा रहेको छ ।
चितवन भन्दा धेरै भ्रष्टाचार हुने जिल्लामा काठमाडौं बाहिर मकवानपुर पर्दछ । चितवनमा यस आर्थिक वर्षको पुस मसान्तसम्म भ्रष्टाचारका ७४० वटा उजुरीहरु परेका थिए ।
चितवन जिल्लाका कार्यालयहरुको काम कारबाहीबारे परेका उजुरीहरुमा हेटौंडामा ४० र अख्तियार दुरुपयोग अनुसन्धान आयोगको केन्द्रीय कार्यालय टंगालमा ७०० वटा उजुरी दर्ता भएका थिए ।
जसमध्ये हेटौंडामा यस आर्थिक वर्षको पहिलो ६ महिनामा १८ वटा उजुरीको फर्छौट भएको थियो भने काठमाडौंमा जम्मा ५७२ वटा उजुरी फर्छौंट भएका छन् ।
अख्तियारको विवरणमा जनाइअनुसार चितवनमा गरिएको स्टिङ अपरेसनमा गत भदौं १२ गते विद्युत् प्राधिकरण भरतपुर कार्यालय सहायक कृष्णबहादुर सुवेदीलाई २० हजार रुपैयाँ घुस लिँदालिँदै पक्राउ गरिएको थियो ।
अख्तियारले जनाए अनुसार चितवनमा भएका भ्रष्टाचारका विषयमा धेरै जसो उजुरीहरु चिठ्ठीबाट नै पर्ने गरेका छन् । प्रदेश नम्बर ३ का जिल्लाहरुमा समग्र उजुरीहरुको अवस्थालाई हेर्ने हो भने महिलामाथि जम्मा ४ वटा मात्र भ्रष्टाचारको आरोप लागेको थियो तर पुरुषहरु ५४४ जना र संघसंस्था १२१ लाई सो आरोप लागेको थियो ।
अख्तियार दुरुपयोग अनुसन्धान कार्यालय हेटौंडाले जनाए अनुसार भ्रष्टाचारको बारेमा सबैभन्दा धेरै उजुरी शिक्षा मन्त्रालयको १८।३२ प्रतिशत रहेको छ ।
त्यस्तै आमसर्वसाधारणसँग अधिक मात्रामा अतिरिक्त रकम लिने कार्यालयहरुमा मालपोत कार्यालय र स्थानीय तह मुख्यरुपमा रहेका छन् । सबैभन्दा धेरै भ्रष्टाचार सम्भाव्य क्षेत्रहरु मध्ये सबैभन्दा धेरै मालपोत र भूमि सुधार कार्यालयहरु त्यस्तै विकासका कार्यहरु रहेका छन् ।
साथै सोही अवसरमा बोल्दै चितवनका जनप्रतिनिधिहरुले कर्मचारीका कारण भ्रष्टाचार बढेको आरोप लगाएका छन् । कालिका नगरपालिका वडा नम्बर ४ का वडाध्यक्ष कृष्णकुमार श्रेष्ठले कर्मचारीका इशारामा जनप्रतिनिधि चल्नुपर्ने बाध्यता रहेको गुनासो गरे ।
गलत स्टिमेटमा हुने कामले सबै जनप्रतिनिधिलाई भ्रष्टाचारी बनाएको उनको भनाइ छ । कालिका नगरपालिकाकै वडा नम्बर १० का वडाध्यक्ष डिलबहादुर गुरुङले स्वास्थ्य, शिक्षामा राज्यले निःशुल्क घोषणा नगरे भ्रष्टाचार झन् मौलाउने बताए ।
कार्यक्रममा भ्रष्टाचार विरुद्धको अभियान चितवनका अध्यक्ष भीमबहादुर श्रेष्ठले जिल्लाका हरेक क्षेत्रमा भ्रष्टाचार मौलाएको भन्दै अख्तियार कडा रुपमा प्रस्तुत हुनुपर्ने सुझाव दिए ।
जिल्लामा भ्रष्टाचार न्यूनीकरण हुन नसकेको स्वीकार प्रमुख जिल्ला अधिकारी जितेन्द्र बस्नेतले गरे । उनले जिल्लामा प्रत्येक महिना हुने कार्यालय प्रमुख र सूचना अधिकारीको बैठकमा कार्यालयमा अनैतिक गतिविधी नगर्न र जनताप्रति उत्तरदायी हुन निर्देशन दिँदै आएको बताए ।
प्रतिक्रिया दिनुहोस्