काठमाडौं,२५ पुस । नेपाली काग्रेसले संस्कृति पर्यटन तथा नागरिक उड्डयन मन्त्री रविन्द्र अधिकारीको राजीनामा माग गरेको छ ।

राष्ट्रियसभाको आजको बैठकको विशेष समयमा बोल्दै नेपाली कांग्रेसका राष्ट्रियसभा सदस्यहरुले वाईड वडी विमान खरिद प्रकरणमा भएको आार्थिक अनियमितताको नैतिक जिम्मेवारी लिदै विभागिय मन्त्रीले राजीनामा दिनुपर्ने माग गरेका हुन् ।

नेपाली कांग्रेसका राष्ट्रियसभा सदस्य रमेश जंग रायमाझीले विभागिय मन्त्रीले राजीनामा गरेर भ्रष्टाचार छानविनमा अख्तियार दुरुपयोग अनुसन्धान आयोगलाई सघाउनुपर्ने बताउनुभएको हो ।

उहाँले विभागिय मन्त्रीले सदनलाई गुमराहमा राख्ने, ढाड्ने काम गरेको दाबी गर्नुभयो । वर्तमान सरकार गठन भए लगत्तै निर्मला पन्तको हत्या, ३३ किलो सुन काण्ड तथा छिटो निर्माणका कामहरु सम्पन्न गर्ने नाममा ठेकेदारहरुलाई नियन्त्रणमा लिने थुन्ने लगायत काण्डै काण्डै भएको भन्दै उहाँले वाईड वडी विमान खरिद प्रकरण पनि त्यसैको निरन्तरता भएको टिप्पणी गर्नुभयो ।

नेपाली कांग्रेसका राष्ट्रियसभा सदस्य धनकुमारी खतिवडाले सरकारले कानुनी राज्यको खिल्ली उठाएको र कानुनी राज समाप्त पार्ने तर्फ उन्मुख भएको आरोप लगाउनुभयो ।

नेकपाका राष्ट्रियसभा सदस्य रामनारायण विडारीले भने राजपाका सांसद रशेम चौधरीको सपथ सही भएको भन्दै सरकारको बचाउ गर्नुभयो । संसदले मुद्धा हेर्ने, अभियोजन गर्ने, अनुसन्धान गर्ने लगायतका लागि छुट्टा- छुट्टै ऐन बनाएको उल्लेख गर्दै आफैले बनाएको ऐन विपरित सांसदहरुले अभिव्यक्ति दिईरहेको भन्दै आपत्ती जनाउनुभयो ।

कांग्रेसका राष्ट्रियसभा सदस्य प्रकाश पन्तले सुन देखि चिनी, घुड्ने देखि उड्ने, ठेकेदार देखि डाक्टर लगायतका घटनाको फेयरिस्त दिदै सबै क्षेत्रमा सरकार प्रभावविहीन भएको दाबी गर्नुभयो ।

उहाँले प्रधानमन्त्रीसंग सभामुख डराउनुपर्ने कुराले संबैधानिक अंगहरुलाई सरकारले आफ्नो विभाग जस्तो बनाएको प्रमाणित भएको दाबी पनि गर्नुभयो ।