काठमाडौं, ३ पुस । नेपाली कांग्रेसको महासमितिको बैठकमा नेताहरुबीच माइक खोसाखोस भएको छ ।

सहमहामन्त्री डा. प्रकाशसरण महत र नुवाकोट जिल्ला सभापति जगदिश्वरनरसिंह केसीबीच माइक खोसाखोस भएको हो । केसी मन्चमा गएर बोल्दाबोल्दै महत आएर माइक खोसेका थिए ।

विधानलाई लिएर नेपाली कांग्रेसको महासमिति बैठक पुन: स्थगित भएको छ। सबैलाई विधान प्राप्त नभएको भन्दै सभापति शेरबहादुर देउवाको विरोध भएपछि बिहानदेखि पुन: सुरु बैठक अहिले रोकिएको हो।

‘चारचार दिनसम्म विधान हातहातमा नआएसम्म छलफल नबढाऔं भनेर सभापतिलाई भन्यौं तर आउँछ-आउँछ भन्नुभयो आएन,’ नुवाकोट जिल्ला सभापति जगदिश्वर नरसिंह केसी भने, ‘सभापतिका तर्फबाट म आफै मञ्चमा गएर शान्त हुन आग्रह गर्दै थिएँ, प्रकाशशरण महत आएर माइक खोस्नुभयो। तार पनि चुटिएको छ।’ महतले माइक खोसेपछि होहल्ला भएको थियो।

महासमिति स्थगित भए पनि अहिले केन्द्रीय समितिको बैठक बसिरहेको छ।