काठमाडौं,१ पुस । कानुन, न्याय तथा संसदीय मामिला मन्त्री भानुभक्त ढकालले संघीय संसदको हिउँदे अधिवेशन छिट्टै आह्वान हुने बताउनु भएको छ ।

प्रतिनिधिसभा भवन मर्मतसम्हार भईरहँदा कानुन, न्याय तथा संसदीय मामिला मन्त्री ढकालले हिउँदे अधिवेशन आह्वान गर्ने तयारी अन्तिम चरणमा पुगेको उल्लेख गर्दै अव ढिलाई नहुने प्रष्टयाउनु भएको हो ।

आईतबार काठमाडौंमा आयोजित संसदीय मामिला पत्रकार समाजको अधिवेशनलाई सम्बोधन गर्दै उहाँले आगामी हिउँदे अधिवेशनमा सरकारले संविधानसँग बाँझिएका कानुन निर्माणको कामलाई उच्च प्राथमिकतामा राखेको पनि स्पष्ट पार्नु भयो ।

आगामी फागुन २० गते भित्र संविधानसँग बाँझिएका सबै कानुन संशोधन गरि सक्नुपर्ने संवैधानिक व्यवस्था छ । मन्त्री ढकालले सो संवैधानिक प्रावधान अनुसार सबै कानुनलाई संविधान अनुकूल बनाउने कामलाई सरकारले उच्च प्राथमिकता दिने बताउनु भयो ।

उहाँले साझा सूचि र संक्रमणकालीन न्यायका लागि आवश्यक कानुन निर्माणको काम पनि संघीय संसदको आगामी हिउँदे अधिवेशनमा सम्पन्न गर्ने सरकारको योजना पनि सार्वजनिक गर्नु भयो ।

मन्त्री ढकालले हालै सम्पन्न अन्तरप्रदेश परिषदको बैठकले साझा सूचिसँग सम्बन्धित कानुन निर्माणको कामलाई सहज बनाएको पनि स्मरण गराउनु भयो ।