काठमाडौं,२३ मङसिर । राष्ट्रिय महिला आयोगले पछिल्लो एक वर्षमा एक हजार २७५ लैङ्गिक हिंसाका उजुरी आयोगमा दर्ता भएको जनाएको छ ।
आयोगले हिंसा न्यूनीकरण गर्न एक वर्ष अगाडि स्थापना गरेको हेल्पलाइनमा सो सङ्ख्यामा पीडितका उजुरी दर्ता भएका हुन् । आयोगमा आव २०७३-०७४ मा १२५ मुद्दा दर्ता भएका थिए ।

आयोगले आफ्ना साझेदार संस्था र अन्य निकायमार्फत ३०२ जनालाई कानूनी परामर्श दिएको छ । विगतमा हेल्पलाइनको व्यवस्था थिएन । हाल ११४५ मा फोन गरेर हिंसाबारे आयोलाई जानकारी गराउन सकिन्छ ।

राष्ट्रिय मानव अधिकार आयोगका अध्यक्ष अनुपराज शर्माले सम्बोधन पत्रिकाको आज विमोचन गर्दै दण्डहीनताका कारण दिन प्रतिदिन हिंसाका घटना बढ्दै गएकाले घटना न्यूनीकरण गर्न अब स्थानीय सरकार संवेदनशील हुनुपर्ने बताउनुभयो ।

महिला आयोगका सचिव अनिलकुमार ठाकुरले हिंसासम्बन्धी घटना बाहिर आएपछि आफ्नो संस्थाले प्रभावितका लागि मनोसामाजिक, कानूनी, आश्रयगृह, बालसंरक्षण, अत्यावश्यक औषधोपचार, मध्यस्थता तथा अन्य सेवा उपलब्ध गराउँदै आएको जानकारी दिनुभयो ।