काठमाडौं,१२ मङसिर । संघीय संसदको सार्वजनिक लेखा समितिले दुई वटा वाईडबढि विमान खरिदका विषयमा सार्वजनिक खरिद अनुगमन कार्यालयको राय मागेको छ ।

नेपाल वायु सेवा निगमले वाईडबढि विमान खरिदमा अनियमितता गरे-नगरेको छानवीन गर्ने निष्कर्षमा पुगेको सार्वजनिक लेखा समितिको बुधबार बसेको बैठकले सो सम्बन्धमा एक हप्ता भित्र राय, सुझावसहितको प्रतिवेदन समितिमा पेश गर्न सार्वजनिक खरिद अनुगमन कार्यालयलाई निर्देशन दिएको हो ।

वाइडबढि विमान खरिद सार्वजनिक खरिद ऐनको विधि र प्रक्रिया अनुसार भए-नभएको खुल्ने गरी समितिमा राय, सुझावसहितको प्रतिवेदन पेश गर्न सार्वजनिक खरिद अनुगमन कार्यालयलाई निर्देशन दिइएको समितिका सभापति भरतकुमार शाहले जानकारी दिनु भयो ।

समितिको बैठकमा कार्यालयका सचिव मधुप्रसाद रेग्मीले समितिको छानवीन प्रक्रियालाई सहज बनाउन आफूले तोकेको अवधिभित्र आवश्यक राय, सुझावसहितको प्रतिवेदन बुझाउने प्रतिवद्धता व्यक्त गर्नु भएको थियो । उहाँले प्रतिवेदनमा सो विमान खरिदका विधि र प्रक्रियाबारे सम्पूर्ण विवरण उल्लेख हुने पनि स्पष्ट पार्नु भयो ।

गत आईतबार बसेको समितिको बैठकमा सभापति शाहले वाइडबढि विमान खरिदमा ६ अरव घोटाला देखिएको दावी गर्नु भएको थियो । २४ अरव रुपैयाँमा खरिद गरिएको वाईडबढि विमानमा ठूलो आर्थिक चलखेल भएको आशंका गर्दै सार्वजनिक लेखा समितिले छानवीनका लागि सम्बन्धित निकायसँगको छलफललाई निरन्तरता दिएको हो ।