झापा,२९असोज । लेखापढी व्यवसायी आन्दोलित बनेपछि जिल्ला मालपोत कार्यालय झापाको दैनिकी कामकाजमा प्रभावित बनेको छ ।

नेपाल लेखापढी कानुन व्यवसायी एसोसिएसन इकाई समिति भद्रपुरमा आवद्ध २६५ व्यवसायीले आइतबारदेखि अनिश्चितकाली कलम बन्द गरेपछि सेवाग्राही समस्या पर्नुका साथै भूमिसुधार तथा मालपोत कार्यालय झापाको राजश्व संकलनमा समेत प्रभाव परेको छ ।

झापाका लेखापढी व्यवसायी आन्दोलनमा उत्रिएपछि भूमि सुधार तथा मालपोत कार्यालयको कामकाज प्रभावित बनेको छ । लेखापढीले अनिश्चितकालीन कलम बन्द गरेपछि कार्यालयमा आउने सेवाग्राहीको जग्गासम्बन्धी काम हुन सकेन । जसले गर्दा अन्य दिनको तुलनामा मालपोत कार्यालय सुनसान देखिएको थियो ।

भूमि व्यवस्था तथा गरिबी मन्त्रालयले असोज २३ गतेदेखि लेखापढी व्यवसायीहरुको सबै हकअधिकारहरुलाई कटौती गर्दै व्यवसायीलाई विस्थापित गर्ने कानुन ल्याएपछि उनीहरु आन्दोलित बनेका हुन् ।

२३ प्रकारका विभिन्न खाले अर्धन्यायिक निकायमा पेस हुने लिखतका ढाँचाहरु विद्यमान मुलुकी संहिता ऐन २०७४ को दफा ४१, ४२ र ४३ को व्यवस्था भूमि मन्त्रालयले लागु गरेको ऐनसंग बाझिएको हुदाँ उक्त ऐन तत्काल सुधारको माग राख्दै लेखापढी व्यवसायी आन्दोलित बनेको नेपाल लेखापढी कानुन व्यवसायी एसोसिएसन इकाई समिति भद्रपुरका सचिव महेन्द्र खतिवडाले बताउनु भयो ।

मन्त्रालयले ऐन जारी गरेपछि लेखापढी कानुन व्यवसायी एसोसिएसन इकाई समितिले असोज २६ गते विभिन्न सात बुँदे माग राख्दै भूमि सुधार तथा मालपोत कार्यालय भद्रपुरमा ज्ञापनपत्र बुझाउँदै हातमा कालो पट्टी बाधेर काम गर्दै आइरहेका थिए । ज्ञापनपत्र बुझाएपनि माग सम्बोधन नहुने भएपछि दवाव स्वरुप लेखापढीको हकअधिकारलाई सुरक्षित गर्न दोस्रो चरणको आन्दोलनको कार्यक्रममा उत्रिएको नेपाल लेखापढी कानुन व्यवसायी एसोसिएसनका केन्द्रीय सदस्य रमेश पोखरेलले बताउनुभयो ।

यता लेखापढी व्यवयासी आन्दोलनमा उत्रिएपछि सेवाग्राहीले आफैले लिखत भर्दा समस्या हुने गरेको छ । टाढा टाढाबाट आएका सेवाग्राहीको जग्गा सम्बन्धी काम लेखापढी व्यवयासीले गर्न नमानेपछि उनीहरु आफै लिखत भर्दा गल्ती हुने गरेको बताउँछन ।

भूमि सुधार तथा मालपोत कार्यालय झापाका प्रमुख रोशनशंकर घिमिरेले लेखापढी व्यवयासी आन्दोलित बनेपनि कार्यालयमा आउने सेवाग्राहीलाई कर्मचारीले नै सहयोग गरी फराम लगायतका कागजात भर्ने लगाएर सेवा दिर्दै आइरहेको बताउनुभयो ।