काठमाडौं,२८असोज । दिवंगत काँग्रेस नेता एवम् पूर्व मन्त्री चक्रप्रसाद बास्तोलाको अपरान्ह अन्त्येष्टि गरिने भएको छ ।

गएराति ललितपुरको खुमलटारस्थित निवासमा निधन हुनु भएका नेता बास्तोलाको आज अपरान्ह ४ बजेपछि अन्त्येष्टि गर्न लागिएको हो । अहिले निवासमा राखिएको उहाँको पार्थिव शरिरमा श्रद्धाञ्जली दिन शुभेच्छुक, काँग्रेस नेता, कार्यकर्ताहरु भेला भएका छन । केहीबेरपछि उहाँको पार्थिव शरिरलाई पार्टी केन्द्रिय कार्यालय सानेपामा श्रद्धाञ्जलीका लागि लगिनेछ । त्यसपछि पशुपति आर्यघाटमा अन्त्येष्टि गर्ने कार्यक्रम रहेकोे काँग्रेसका मुख्य सचिव कृष्णप्रसाद पौडेलले जानकारी दिनु भयो ।

निवासमा राखिएको उहाँको पार्थिव शरिरलाई श्रद्धाञ्जली व्यक्त गर्दै काँग्रेस वरिष्ठ नेता रामचन्द्र पौडेलले नेता बास्तोलालाई प्रखर र प्रतिभाशाली नेताको रुपमा स्मरण गर्नु भयो । उहाँले पार्टीलाई राजनीतिक, कूटनीतिक तथा आर्थिक क्षेत्रमा महत्वपूर्ण सुझाव दिनु हुने नेता बास्तोलाको निधनप्रति गहिरो दुःख समेत व्यक्त गर्नु भयो ।

२०६९ साल पुस १४ गते विराटनगरको बन्धु भेलामा सहभागी हुने क्रममा ब्रेन अट्याक हुनु भएका बास्तोला त्यसयता अचेत अवस्थामा रहनु भएको थियो । बास्तोलाले परराष्ट्रमन्त्री र भारतका लागि नेपाली राजदुतको भूमिका पनि कुशलताका साथ निर्वाह गर्नु भएको थियो । नेता बास्तोला २०४६ सालको जनआन्दोलनपछि बनेको गिरिजाप्रसाद कोइराला नेतृत्वको सरकारलाई परराष्ट्र नीति निर्माणमा महत्वपूर्ण योगदान दिने नेताको रुपमा पनि परिचित हुनुहुन्थ्यो ।