सप्तरी, १८ असोज । राष्ट्रिय जनता पार्टीका नेता राजकिशोर यादवले संविधान संशोधन, महंगी नियन्त्रण तथा जनताको सुरक्षा दिन नसकेको वर्तमान सरकार पूर्णरुपले असफल भएको बताएका छन ।

राजपा सप्तरीद्वारा विहिवार विहान राजविराजमा आयोजित पत्रकार सम्मेलनमा बोल्दै नेता यादवले आफूहरुले देश र जनताको हितका लागि समर्थन दिएको तर सरकार अहिले सबै क्षेत्रमा असफल भईसकेको बताए ।

नेता यादवले समस्या समाधानका लागि सरकारलाई अन्तिम पटक सुध्रिने मौकाका साथ असोज २२ गते जिल्लास्थित प्रमुख जिल्ला अधिकारी मार्फत प्रधानमन्त्रीलाई ज्ञापन पत्र दिने तयारीमा पार्टी लागेको जानकारी दिए ।

संविधान संशोधनको कुरालाई थाँती राख्दै रेशम चौधरीलाई सांसदको सपथ ग्रहण समेत गर्न नदिनु जनमत प्रतिकै अपमान रहेको भन्दै उनले यसले राज्यको पुर्वाग्रही चरित्र उदाङ्गो भएको आरोप लगाए ।

कैलालीको टिकापुर घटना छानविनका लागि सर्वोच्चका पुर्व न्यायाधीश गिरिष चन्द्रलालको अध्यक्षमा गठित तराई मधेश थरुहट जाँचवुझ आयोगको प्रतिवेदन समेत अहिलेसम्म सार्वजनिक नगरिएको प्रति आपत्ति जनाए ।

उनले संघियताप्रति वितृष्णा फैलाउने, ३३ किलो सुन तस्करीका आरोपीलाई जोगाउने, निर्मला हत्या काण्डका अपराधीलाई संरक्षण दिने काममा लागेको सरकारलाई कसरी समर्थन दिईरहने भन्दै सुन तस्करीमा पार्टीकै प्रभावशाली नेता फस्ने अवस्था आएपछि त्यसको छानविनै रोकिएको उनको दाबी छ ।

नेता यादवले निजगढ विमानस्थल आवश्यक भएपनि विना तयारी त्यहाको वन फँडानी गर्नु तराई मधेशलाई मरुभुमिकरणको षडयन्त्र रहेको संज्ञा दिए ।