काठमाडौ, १६ असार । दोस्रो चरणको स्थानीय तह निर्वाचनको मतगणनाको जारी छ ।
प्रदेश नम्बर १, ५, ७ अन्तर्गत ३५ जिल्लाका ३ सय ३४ तहमध्ये केही स्थानीय तह बाहेक सबै स्थानीय तहमा मतगणना भइरहेको छ । मतगणनासँगै मतपरिणाम आउने क्रम पनि जारी छ । बझाङको काँडा गाउँपालिकामा नेपाली कांग्रेसका राजेन्द्र धामी, सोलुखुम्बुको चिचिला गाउँपालिकामा पासाङ नुर्वु शेर्पा, सोलुखुम्बुकै सिलिचोङ गाउँपालिकामा रामबहादुर राई र बाजुराको छेडेदह गाउँपालिकामा नरबहादुर राउन गाउँपालिका अध्यक्षमा निर्वाचित हुनु भएको छ । त्यस्तै नेकपा एमाललेबाट बझाङको मष्टा गाउँपालिकामा कर्णबहादुर बठाउत, बाजुराको पाण्डवगुफा गाउँपालिकामा कालीबहादुर शाही र खोटाङको जन्तेढुङ्गा गाउँपालिकामा शंकर राई गाउँपालिका अध्यक्षका रुपमा निर्वाचित हुनु भएको छ । नेकपा माओवादीको केन्द्र भने एक स्थानमा मात्र बिजयी भएको छ । माओवादी केन्द्रका डम्बरबहादुर बस्नेत सोलुखुम्बुको लिखुुपीके गाउँपालिकाको अध्यक्षको रुपमा निर्वाचित हुनु भएको छ । मतगणना भएरहेको अधिकांस स्थानीय तहमा नेपाली कांग्रेसले अग्रता लिएको छ भने नेकपा एमाले दोस्रो र नेकपा माओवादी केन्द्रले तेस्रो स्थानमा अग्रता लिएको छ ।