काठमाडौं, २१ भाद्र । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ चारदिने भ्रमणमा आज भारत पुगेका छन् । अध्यक्ष दाहाल दिल्लीमा ओर्लिने वित्तिकै उनलाई भारतीय प्रधानमन्त्री नरेन्द्र मोदीका सुरक्षा सल्लाहकार अअिजत डोभलले डिनरसहित स्वागत गरेका छन् ।

भारतको इन्टिलिजेन्स ब्युरोको प्रमुखबाट अवकास प्राप्त गरेपछि सन् २०१४ बाट उनी सल्लाहकारमा नियुक्त भएका थिए । इन्टिलिजेन्सको क्षेत्रमा राम्रो काम गरेका उनले अहिले पनि भारतीय ‘रअ’ लाई नियन्त्रणमा राखेका छन् । उनले त्यस क्षेत्रमा गरेका कामको चर्चा अहिले पनि हुने गरेको छ ।

शुक्रबार साढे १२ बजे भारतीय गृहमन्त्री राजनाथ सिंहसँग उनको छलफल हुनेछ भने ३ बजे एउटा अन्तरक्रिया कार्यक्रममा सहभागी हुने प्रचण्डका नीजि सचिवालयले जनाएको छ । साँढे ६ बजे उनी व्यापारीहरुले पिएचडी हाउसमा आयोजना गर्ने कार्यक्रममा सहभागी हुनेछन् ।
भदौ २३ गते मात्र प्रधानमन्त्री मोदीसँग साढे १२ बजे भेटघाट हुने कार्यक्रम हरेको छ । त्यसको केही घण्टापछि भारतीय विदेशमन्त्री सुष्ममा स्वराजसँग लन्च बैठक हुने बताइएको छ । त्यसपछि बेलुकाको खानासँगै इण्डिया फाउण्डेशनसँग छलफल गर्ने कार्यक्रम रहेको छ । प्रचण्ड ताज महल होटलमा बसेका छन् ।

इण्डिया फाउण्डेशन भारत सरकारका लागि थिंक ट्यांकको रुपमा काम गरिरहेको संस्था हो । उक्त संस्थाले सुरक्षा, राजनीतिक एवम् सूचना प्रविधिमा अध्ययन गरी सरकारलाई सल्लाह दिने गरेको छ । यसमा अधिकाँश सदस्य भारतीय जनता पार्टीका रहेका छन् । फाउण्डेशनका निर्देशक एवम् भाजपाका महासचिव राममाधवले नेपाल आएर प्रचण्डलाई औपचारिक निमन्त्रणा दिएका थिए । प्रचण्ड २४ गते स्वदेश फर्किने कार्यक्रम रहेको उनको सचिवालयले बताएको छ ।