बाग्लुङ, १३ चैत्र । बाग्लुङको प्रसिद्ध धार्मिक स्थल बाग्लुङ कालिका मन्दिर मा आज राम नवमी को अवसरमा भक्तजनहरूको उल्लेख्य भीड देखिएको छ।

विशेषगरी बडा दशैं र चैते दशैंमा यहाँ दर्शनार्थीहरूको अत्याधिक चाप हुने गरेको छ। ऐतिहासिक तथा पौराणिक महत्व बोकेको बाग्लुङ कालिका मन्दिरमा वर्षभरि नै भक्तजनहरूको आवतजावत भइरहे पनि पर्व–विशेषमा यहाँ भीडभाड झनै बढ्ने गर्दछ।

आज राम नवमीको दिन मन्दिर परिसरमा बिहानैदेखि दर्शनार्थीहरूको लामो लाइन लागेको देखिएको छ। कालिका मातामा आस्था राखी शुद्ध मनले मागेमा चिताएको वर प्राप्त हुने धार्मिक विश्वास रहिआएको छ। यही विश्वासका कारण देशका विभिन्न जिल्लासहित भारतका विभिन्न स्थानबाट समेत भक्तजनहरू यहाँ आउने गरेका छन्।

मन्दिर व्यवस्थापन गर्दै आएको कालिका भगवती गुठी संस्थान ले हरेक वर्ष चैत्र अष्टमीका अवसरमा चैत्राष्टमी मेला तथा चैते दशैं मेला आयोजना गर्ने गर्दछ। मेलाका क्रममा धार्मिक अनुष्ठान, पूजाआजा , खेलकुद, सांगीतिक तथा सांस्कृतिक कार्यक्रमहरू समेत सञ्चालन हुने गरेका छन्।

पछिल्लो समय धार्मिक पर्यटनको आकर्षण बढ्दै जाँदा बाग्लुङ कालिका मन्दिरमा भक्तजनहरूको संख्या वर्षेनी बढ्दो क्रममा रहेको छ। धार्मिक आस्था र पर्यटनको केन्द्र बनेको बाग्लुङ कालिका मन्दिर यतिबेला श्रद्धालुहरूले भरिभराउ बनेको छ।