कञ्चनपुर, ९ भाद्र । १३ वर्षीया बालिका निर्मला पन्तको बलात्कारपछि हत्या काण्डले तनावग्रस्त कञ्चनपुरको महेन्द्रनगरमा अहिले सुरक्षा समितिको बैठक बसिरहेको छ ।

निर्मला पन्तको बलात्कारपछि हत्या गर्नेलाई पक्राउ गर्न माग गर्दै दिनहुँ प्रदर्शन हुँदा तनावग्रस्त बनेपछि त्यहाँ अहिले कर्फ्यू लागेको छ ।
अस्ति बेलुकीदेखि कर्फ्यू लागेकोमा हिजो बिहान खुलाएपछि दिउँसो फेरि तनाव भएपछि बेलुकीदेखि लगाइएको कर्फ्यू अर्को आदेश नभएसम्मका लागि लागू हुने स्थानीय प्रशासनले जनाएको छ ।

निर्मला पन्तको बलात्कारपछि हत्या गर्नेलाई पक्राउ गर्न माग गर्दै भएको प्रदर्शनमा प्रहरीले शुक्रबार गोली चलाउँदा एक जनाको ज्यान गएको थियो ।
प्रदर्शनका क्रममा २४ जना घाइते भएका छन् । अहिले बसिरहेको सुरक्षा समितिको बैठक सकिएपछि के गर्ने भन्ने थाहा हुनेछ । निमर्लाको बलात्कार पछि हत्या भएको थियो । तर प्रहरीले हत्यारालाई पत्ता लगाउन चासो नदिएको भन्दै स्थानीय प्रदर्शनमा उत्रँदा अवस्था तनावग्रस्त बनेको हो ।
त्यस्तै निर्मला हत्या प्रकरणको छानबिन गर्न बनेको गृहमन्त्रालयका सह–सचिव हरिप्रसाद मैनालीको संयोजकत्वमा बनेको उच्चस्तरीय छानबिन समितिको टोली कञ्चनपुर पुगे पनि अनुसन्धान सुरु गर्न सकेको छैन ।