काठमाडौं, १२ चैत — केपी शर्मा ओली ले आफ्ना सांसदहरूलाई संसदमा व्यक्तिगत धारणा होइन, पार्टीको आधिकारिक विचार मात्रै प्रस्तुत गर्न स्पष्ट निर्देशन दिएका छन्। बिहीबार च्यासलस्थित पार्टी केन्द्रीय कार्यालयमा नवनिर्वाचित प्रतिनिधिसभा सदस्यलाई सम्बोधन गर्दै उनले अनुशासन र एकतामा जोड दिएका हुन्।

नेकपा एमाले का अध्यक्ष ओलीले सांसदहरूलाई स्वतन्त्र रूपमा बोल्ने शैलीप्रति असन्तुष्टि जनाउँदै भने, “पार्टीका विचार संसदमा बोल्नुपर्छ। पार्टीले देशको विचार अघि बढाएको छ। तीभन्दा बाहिर ‘मलाई यस्तो लाग्यो’ भनेर बोल्ने छुट हुँदैन।” उनको भनाइले संसदीय भूमिकामा व्यक्तिगत अभिव्यक्तिभन्दा पार्टी लाइनलाई प्राथमिकता दिनुपर्ने स्पष्ट संकेत गरेको छ।

ओलीले पार्टीले संसदमा प्रभावकारी भूमिका खेल्ने दाबी गर्दै भ्रम फैलाउने होइन, जनतालाई सचेत बनाउने जिम्मेवारी सांसदहरूको भएको बताए। “हामीले जनतालाई सही जानकारी दिने र राजनीतिक रूपमा सचेत बनाउने काममा चुक्नु हुँदैन,” उनले जोड दिए।

यससँगै उनले पार्टीभित्र एकता कायम राख्न पनि आग्रह गरे। प्रतिकूल अवस्थामा आन्तरिक विवादलाई सार्वजनिक रूपमा उचाल्नु उपयुक्त नहुने भन्दै उनले सबैलाई एकढिक्का भएर अघि बढ्न निर्देशन दिए। “जुनसुकै कठिन अवस्थामा पनि पार्टी एकजुट भएर अघि बढ्नुपर्छ,” उनले भने।

ओलीको यो निर्देशनलाई एमालेभित्र अनुशासन कडाइ र ‘केन्द्रित राजनीतिक लाइन’ लागू गर्ने प्रयासका रूपमा व्याख्या गरिएको छ। नयाँ संसदको सुरुआतसँगै उनले सांसदहरूलाई स्पष्ट सन्देश दिएका छन्— पार्टीभन्दा बाहिर गएर व्यक्तिगत एजेन्डा अघि सार्ने छुट छैन।