रुकुम,२८ साउन । पश्चिमको त्रिवेणि गाउँपालिका वडा नम्बर नौंका वडा सदस्यको मृत्यु भएको छ । मुसीकोट नगरपालिका एक सल्लेमा रहेको राप्ती समाज अस्पतालमा उपचारको क्रममा रावलको आज बिहान मृत्यु भएको हो । ज्वरो आउँने, वान्ता हुन खोज्ने र कमजोरी महशुस भएपछि २७ वर्षिय रावल शनिबार अस्पताल भर्ना हुनुभएको थियो ।

मृतकका आफन्तहरुले भने स्वास्थ्यकर्मीको लापरर्वाहिका कारण मृत्यु भएको भन्दै अस्पतालमा तोडफोड गरेका छन् । आज दिउँसो आक्रोशित मृतकका आफन्तले अस्पतालमा ढुंगा मुडा गर्दा अस्पतालका झ्यालका सिसा, बोर्ड लगाएतमा क्षति पुगेको अस्पतालले जनाएको छ ।

गलत सुईका कारण रावलको मृत्यु भएको आफन्तहरुको दाबी छ । सुई लगाउँनुभन्दा अगाडि सामान्य अवस्था रहेपनि सुई लगाउँने वित्तिकै रावलको मृत्यु भएको उनिहरुको भनाई छ । आफुहरुले अन्यत्र लैजान खोज्दा पनि अस्पतालले डिस्चार्ज नगरेको आफन्तले दाबी गरेका छन् ।

अस्पतालले भने आफ्नो कुनै कमजोरी नरहेको दाबी गरेको छ । बिरामी अन्तिम अवस्थामा अस्पताल आएको र उपचार गर्दा गर्दै मृत्यु भएको अस्पतालको भनाई छ । वडा सदस्य रावलको मृत्यु भएपछि आज दिनभर अस्पताल तनाव ग्रस्त बनेको थियो । मृतकका आफन्तले तानवकैबीच शव बुझेका छन् ।

अस्पताल प्रशासन, मृतकका आफन्त, जिल्ला समन्वय समितिका प्रमुख राजकुमार शर्मा, त्रिवेणि गाउँपालिकाका अध्यक्ष झक्कुप्रसाद घर्ती, मुसीकोट नगरपालिकाका देविलाल गौतम लगाएतको सहभागीतामा भएको छलफल पछि मृतकका आफन्तहरुले शव बुझेका हुन् ।

त्यस्तै अस्पतालले मृतकका बालबच्चाको पठन पाठनका लागि एक लाख सहयोग गर्ने र बेड बिमा बाफतको रकम पनि उपलब्ध गराउँने सहमति भएको बताईएको छ ।