एजेन्सी, १६ साउन। खेल मैदानमा खराब आचरण र अनुशासनहीन हर्कत गरेको अवस्थामा खेलाडीलाई रातो वा पहेँलो कार्ड दिइन्छ । यो सामान्य कुरा हो। तर अब सुरु हुन लागेको सिजनदेखि इंग्लिस क्लबका प्रशिक्षकले पनि त्यस्तो हर्कत गरेकोमा पहेँलो वा रातो कार्ड दिइने निर्णय इंग्लिस फुटबल एसोसियसनले गरेको छ ।

अनुशासन विपरित कार्य गरेमा प्रशिक्षक तथा व्यवस्थापकलाई मौखिक चेतावनी दिइनेछ । तर एफए कप, लिग कपलगायत अन्य प्रतियोगितामा भने प्रशिक्षकलाई पनि कार्ड देखाइनेछ ।

कार्डको संख्याका आधारमा उनीहरुलाई प्रतिबन्ध पनि लाग्न सक्नेछ । चार वटा पहेँलो कार्ड पाएपछि प्रशिक्षकले एक खेलको प्रतिबन्ध भोग्नु पर्नेछ । तर मैदानमा ठूलो झै–झगडा गरेको अवस्थामा उनीहरुलाई १६ खेल सम्मको प्रतिबन्ध लाग्न सक्ने बताइएको छ ।

यसअघि प्रशिक्षकले म्याच अफिसियललाई चेतावनी समेत दिँदै आएका थिए । तर अब म्याच अफिसियललाई अनुचित शब्द वा हाउभाउ देखाएमा, पानीको बोटललाई किक हानेमा वा मैदानमा फालेमा पनि उनीहरुले कार्ड पाउन सक्नेछन् ।