काठमाडौं, १४ साउन । जो अगुवा भने जस्तै भएको छ, नेपाल कपडा तथा सिलाई व्यवसायी संघमा नेपाली कपडा तथा सिलाई व्यवसायीक क्षेत्रमा देखिएका समस्या र चुनौंती हल गर्न झण्डै दुई दशक देखि सक्रियरुपमा आफ्ना हकहित र अधिकारका निम्ति सक्रिय रहेर आईराखेको यस संघ अहिले विभाजनको संघारमा पुगेको आरोप लगाइएको छ ।

केन्द्रीय अध्यक्ष रामकृष्ण श्रेष्ठका कारण विभाजनको संघारमा पुगेको असन्तुष्टहरुको आरोप छ ।‘विशेषत वर्तमान अध्यक्ष रामकृष्ण श्रेष्ठका कारण संघको झण्डै २ दशक लामो यात्रामा संघ यति धेरै कमजोर भएको यो पहिलो पटक हो, संघ फुटको संघारमा पुगिसकेको छ,’ एक सदस्यले भने ।अहिले संघमा देशभरका ५४ जिल्लाहरु सक्रिय सदस्यकोरुपमा रहेका छन् ।

वर्तमान कार्यशैलीका कारण संघ अपेक्षाकृतरुपमा अघि बढ्न नसकेको, सिमित व्यक्तिको अधिनभित्र रहि संघलाई ठगी खाने भाँडोकारुपमा प्रयोग गरिएको, जिल्ला संघका सक्रिय सदस्यहरुलाई पाखा लगाई आफ्ना नजिकका व्यक्तिहरुलाई आफूखुसी कार्यसमितिमा मनोनयन गर्नेजस्ता अवान्छनीय गतिबिधि अगाडि बढेको असन्तुष्टहरुले बताएका छन् ।

‘चाहे रामेछापमा अपनाएका आफ्ना रवैया हुन् या कास्कीमा सक्रिय पदाधिकारी सदस्य माथि गरेको अन्यायपूर्ण व्यवहारले सिङ्गो संघलाई लज्जीत बनाएको छ,’ कास्की जिल्ला संघका एक सदस्यले बताए । यदि यस्तै रवैया कायम रहे यस संघभित्र आफूहरु अट्न नसक्ने उनले बताएका छन् ।

अध्यक्ष श्रेष्ठले विधानसम्मत सम्पन्न विभिन्न जिल्ला संघका साधारणसभामा ठाडो हस्तक्षेप गरी आफूइतरका व्यक्तिलाई प्राथमिकता दिने, सक्षम, अनुभवी र मिहिनेती व्यक्तिहरुलाई पाखा लगाउने काम स्वयं अध्यक्षको तर्फबाट भइराखेको ती सदस्यले बताए ।

असन्तुष्टका अनुसार अध्यक्ष श्रेष्ठका कारण संघमा देखिएका समस्याहरु

१. वार्षिक साधारणसभा विधानत एक वर्षमा गर्नुपर्नेमा ३ महिना बितिसक्दासमेत नगरेको । १५ औं साधारणसभा मिति २०७३–१२–१३ मा गरेपछि २०७४–१२–३० मा गर्नुपर्नेमा अहिलेसम्म नगरेको ।

२. विधानत जिल्ला कार्यसमितिहरुले हरेक वर्ष जेठ भित्र साधारण सभा गर्नुपर्नेमा ५४ वटा जिल्ला कार्यसमितिमध्ये १० वटाको मात्र साधारणसभा भएको ।

३. केन्द्रीय कार्यसमितिमा निर्वाचित हुन कम्तिमा २ वर्ष जिल्ला कार्यसमितिमा काम गरेको हुनुपर्ने व्यवस्था रहँदा रहँदै कास्की जिल्लाबाट साधारण सदस्यसमेत नविकरण नगरेका र कार्यसमितिमा काम नगरेको सदस्य श्री कृष्ण शेवानलाई मनोनयन गरेको ।

४. आफ्नो पक्षमा नरहेका जिल्लाका कार्यसमितिहरु कास्की, रामेछाप, वाग्लुङ, म्याग्दी, पर्वतलाई जथाभावी व्यवहार गरेको ।

५. विधान विपरित कार्य गरेको भन्दै प्रदेश नम्बर ४ का जिल्लाहरुबाट केन्द्रीय संघको कार्यक्रम बहिस्कार हुँदै आएको ।

६. कास्की जिल्ला संस्थापक अध्यक्ष शम्भु खातीद्वारा विधान विपरित कार्यसमितिबारे पटक पटक प्रेस विज्ञप्ति तथा केन्द्रमा निवेदन दिंदा कास्की जिल्लालाई नै अवैधानिक मानिएको ।

७. त्यस्तै कास्की जिल्लाका संस्थापक अध्यक्ष शम्भु खातीबाट यो अवस्थाको समाधान नगरे कानूनी बाटो अपनाउने र यस्तै थिचोमिचोको निरन्तरता भयो भने संघ एउटै भएर बस्न गाह्रो हुने अवस्था छ भन्दासमेत कुनै वास्ता नगरिएको ।

८. रामेछाप जिल्लाका सचिव इश्वर बरालकाअनुसार जिल्लाको विशेष साधारण सभामा सबैको कार्यकाल १ वर्ष बाँकी रहँदा रहँदै केन्द्रीय अध्यक्ष रामकृष्ण श्रेष्ठले बलजफ्ती नयाँ कार्यसमिति रातको १२ बजे घोषणा गरेको भन्दै त्यहाँबाट विरोध हुँदै आएको ।
अध्यक्षको यस्तो रवैया तत्काल नसच्याए र जारी रहे संघ एउटै भएर बस्न नसक्ने चेतावनी दिएका छन् ।