काठमाडौं,२८ असार । नेपाली कांग्रेसका सांसद अमरेशकुमार सिंहले वीर अस्पतालमा कार्यरत एक चिकित्सकलाई अपहरण शैलीमा गृह मन्त्रालय लगेर धम्की दिइएको आपत्ती जनाउनुभएको छ ।

प्रतिनिधीसभाको बिहीबारको बैठकको शुन्य समयमा सिंहले गृहमन्त्री रामबहादुर थापाको आदेशमा वीर अस्पताल परिसरस्थित ट्रमा सेन्टरमा कार्यरत् डाक्टर भोजराज अधिकारीलाई अपहरण शैलीमा गृह मन्त्रालय लगेर धम्की दिइएको भन्दै आपत्ति जनाउनुभएको हो ।

सिंहले अहिले जनयुद्धकाल नभएको स्मरण गराउँदै ‘किम जोङ उन शैली बन्द गर्न’ सरकारको ध्यानाकर्षण गराउनुभयो । सरकारले बुद्धिजीवी, पेसाकर्मीलगायतलाई आतंकित पारिएकोमा उहाले आपत्ती जनाउनुभयो ।

यसअघि गृहमन्त्रीको आदेशमा वीर अस्पताल परिसरमा रहेको ट्रमा सेन्टरमा कार्यरत डाक्टरलाई ’अपहरण शैली’मा गृह मन्त्रालय लगेर धम्की दिइएको समाचार सार्वजनिक भएको थियो । यस बिषयमा चिकित्सक संघले पनि कडा आपत्ती जनाएको छ ।