काठमाडौं, १९ वैशाख । नेत्रविक्रम चन्द विप्लव नेतृत्वको नेपाल कम्युनिस्ट पार्टीका एक नेता भारतमा पक्राउ परेका छन्। उनलाई गत वैशाख ३ गते विराटनगरस्थित भारतीय दूतावासको इकाई कार्यालयमा बम विस्फोट गराएको आरोपमा पक्राउ गरिएको हो ।

भारतीय पत्रिका ‘दि इकोनोमिक टाइम्स’ले जनाए अनुसार मोरङ घर भएका ६० वर्षीय सुरेश कुमार राई उर्फ सागर राईलाई कोलकाताको स्पेसल टास्क फोर्सको विशेष टिमले दिल्लीबाट पक्राउ गरेको हो।

इकोनोमिक टाइम्सले प्रहरीलाई उद्‍धृत गर्दै लेखेको समाचार अनुसार राई पार्टीका जिल्ला सचिव हुन्। घटनापछि उनी भागेर दिल्लीमा गएको समाचारमा उल्लेख छ।

विराटनगरस्थित भारतीय दूतावासको इकाई कार्यालयमा गत वैशाख ३ गते बम विस्फोट भएको थियो। दश वर्ष अघि सप्तकोशीमा आएको बाढीपछि राहत र निर्माणको लागि भारतले विराटनगरमा कार्यालय खोलेको थियो। सो कार्यालय बन्द गर्नुपर्ने माग उठे पनि भारतले बन्द गरेको छैन। सोहि कार्यालय नजिकै बम विस्फोट गरिएको थियो ।

विस्फोटमा भवनको पर्खालमा सामान्य क्षति पुगेको जिल्ला प्रहरी कार्यालय मोरङले जनाएको थियो। विस्फोट नेत्रविक्रम चन्द विप्लव समूहले गराएको प्रहरी स्रोतको दाबी भएपनि विस्फोटको जिम्मेवारी कसैले लिएको थिएन।

भारतमा पक्राउ परेका राईलाई भारतीय दूतावासमा गराइएको विस्फोटको मास्टरमाइन्ड भएको आरोप लगाइएको छ।