कञ्चनपुर, १५ वैशाख । कञ्चनपुरको दक्षिणी सिमावर्ती क्षेत्रमा भारतीय सुरक्षा बल एसएसबीले नेपालीमाथि ज्यादती गरेको छ । जिल्लाको पुर्नवासमा नगरपालिका वडा नम्वर–९ बिचफाटा स्थित दशगजा क्षेत्रमा भारतीय सुरक्षा बल एसएसबीले नेपालीमाथि ज्यादती गरेको हो । हात्ती आतङ्क रोक्न लगाउँदै गरेको फेन्सी तारवार तोडफोड गरिएको छ भने नेपाली माथि हातपात समेत गरेको स्थानियले आरोप लगाएका छन् ।
नेपाल भारत सिमाना स्थित बिचफाँटामा हातहतियार सहितको ठूलो सँख्यामा आएको भारतीय प्रहरीले विद्युतीय फेन्सी तारवार लगाउन रोक लगाउँदै बनाएका संरचनामा समेत तोडफोड गरेको पुनर्वास नगरपालीका वडा नम्बर ९ का वडाअध्यक्ष नारायण प्रसाद जैसीले बताए । ‘दूई महिना अघि मौखिक सम्झौता गरेर काम थालनी गरेपनी सो क्षेत्रमा नयाँ आएका एसएसबी प्रमुख राजीव कुमार सहितको टोलीले दुव्र्यवहार गरेको हो’ उनले भने, ‘सिमामा एसएसबीको ज्यादती सहि सक्नु छैन ।’
समान्य कामकाजका लागि समेत भारत तर्फ जानुपर्ने नेपालीको बाध्यता लाई फाइदा उठाउँदै एसएसबीले समय समयमा सास्ती दिने गरेको स्थानीय बताउँछन् । नेपाली भूमीमा आएर बनाएको संरचनामाथि तोडफोड गर्नुले भारतको नेपाली र नेपाल माथिको हेपाहा प्रवृती भएको उनिहरुको भनाइ छ । सीमा समस्या अन्तर्राष्ट्रिय समस्या भएकाले यसलाई कुटनितिक तवरले सुल्झाउन जरूरी रहेको ईलाका प्रहरी कार्यालय त्रिभुवनवस्तीका प्रहरी निरीक्षक दलराम टमटाले बताए । समस्या समाधानका लागि २/४ दिन भित्रैमा नेपाल भारतको संयुक्त सीमा सर्वे टोली आईपुग्ने र सीमा निर्धारण गरिने उनले बताए ।
भारतीयको दादागिरी र हेपाहा प्रवृतीले नै बेलाबेलमा सीमा समस्या निम्तिने गरेको पुनर्वास नगरपालीकाका नगर प्रमुख जीवनरजा थापाले बताए । ‘सिमामा हुने समस्या तल्लो तहबाट समाधान गर्न सकिदैन’, उनले भने, ‘समस्या सामाधानका लागि सरकारी स्तरबाट नै पहल थालिनुपर्छ ।’
गत बर्ष पनि एसएसबीले गरेको ज्यादतीका कारण कञ्चनपुरमा भएको आन्दोलनमा गोवीन्द गौतमको ज्यान गएको थियो । उक्त घटनापछि थोरै साम्य भएको विवाद एसएसबीको ज्यादीपछि फेरि चर्किएको छ । यसरी बेलाबेलामा भइरहने विवाद अन्त्यका लागि स्थानीय वासिन्दाले सरकारलाई आग्रह गरेका छन ।
प्रतिक्रिया दिनुहोस्