झापा, साउन १८ । झापामा प्रमुख जिल्ला अधिकारी र सहायक प्रमुख जिल्ला अधिकारी विहिन बनेपछि जिल्लाको शान्ति सुरक्षामा समस्या थपिएको छ ।

प्रमुख जिल्ला अधिकारी उत्तरकुमार खत्री साउन २ गते अर्थमन्त्रलायमा सरुवा भएर गएदेखि झापा १६ दिनदेखि सिडियो विहिन बनेको हो । झापामा नयाँ सिडियो पठाउनेबारे गृहमन्त्रालयबाट कुनै जानकारी नआइसकेको प्रशासन कार्यालय झापाका कर्मचारीले जनकारी दिएका छन् ।

झापाका सम्पूर्ण सरकारी कार्यालयका अभिभावक सिडियो नै नभएपछि अन्य सरकारी कार्यालय प्रमुखलाई दैनिक कामकाजको बिषयमा दिने निर्देशन तथा जिल्लाको शान्ति सुरक्षामा समेत समस्या परेको छ ।
१६ दिनदेखि झापामा सिडियो नभएपछि सहायक प्रमुख जिल्ला अधिकारी भिमप्रसाद तिवारीले निमित्त सिडियो भएर जिम्मेवारी निर्वाह गरिरहेका छन् । झापामा दुई जना सहायक प्रमुख जिल्ला अधिकारी हुनुपर्नेमा अहिले एक जना मात्र सहायक प्रमुख जिल्ला अधिकारी मात्रै रहेको छ । डमरुप्रसाद निरौलाको सरुवा भएदेखि उनको स्थानमा गृहले अर्को सहायक प्रमुख जिल्ला अधिकारी पठाएको छैन । तीन दिन अघि सहायक प्रमुख जिल्ला अधिकारी भिमप्रसाद तिवारी विदामा गएकाले अहिले निमित्त प्रमुख जिल्ला अधिकारीको काम इलाका प्रशासन कार्यालय दमकका प्रमुख भोजराज श्रेष्ठले गरिरहेका छन् ।

निमित्त सिडियो श्रेष्ठका अनुसार प्रशासन कार्यालयबाट हुने मुद्धा सम्बन्धी काम सिडियो नहुँदा रोकिएको छ । कार्यालयबाट दिइने सेवा सम्बन्धी अरु कुनै काम नरोकिएको उनले बताए पनि सेवाग्रही भने समस्यामा परेका छन् ।

गृहले यसअघि झापामा सिडियो तोकेर पठाएपछि मात्र सिडियो सरुवा गर्न प्रचलन थियो । तर, यसपटक भने गृहले प्रशासन कार्यालय झापामा नयाँ सिडियो नपठाई सिडियोको सरुवा गरेको छ ।