काठमाडौं, १९ जेठ । पर्साको वीरगञ्ज महानगरपालिकाका मेयर राजेशमान सिंह मंगलबार बिहान पर्साकै ठोरीस्थित एक रिसोर्टबाट पक्राउ परेका छन् ।

जिल्ला प्रहरी कार्यालय पर्साका अनुसार बिहान करिब ६ बजेर ७ मिनेट जाँदा विशेष प्रहरी टोलीले उनलाई ठोरी गाउँपालिका–३ स्थित रिसोर्टबाट नियन्त्रणमा लिएको हो । उनी पक्राउ पुर्जी जारी भएपछि फरार रहेका थिए ।

प्रहरीका अनुसार मेयर सिंहविरुद्ध लिखतसम्बन्धी कसुरमा अनुसन्धान भइरहेको छ । जिल्ला प्रहरी कार्यालय पर्साका सूचना अधिकारी राजु कार्कीका अनुसार उनीमाथि नागरिकतासम्बन्धी लिखतसम्बन्धी मुद्दामा अनुसन्धान अघि बढाइएको हो ।

यसअघि १२ जेठमा पर्सा जिल्ला अदालतले सिंहविरुद्ध पक्राउ पुर्जी जारी गरेको थियो । पक्राउ पुर्जी जारी भएपछि उनी सम्पर्कविहीन भएका थिए ।

पक्राउअघि प्रहरीले उनको घरमा खानतलासी गर्नुका साथै पीएसँग समेत सोधपुछ गरेको थियो । त्यसपछि मात्र प्रहरीले उनलाई पक्राउ गर्न सफल भएको जनाएको छ ।

प्रहरीका अनुसार पक्राउ प्रक्रियाका क्रममा लामो समयको खोजीपछि मात्र उनलाई नियन्त्रणमा लिन सकिएको हो । घटनासम्बन्धी थप अनुसन्धान जारी रहेको प्रहरीले जनाएको छ ।