काभ्रे, २५ चैत । राष्ट्रसंघीय उच्च पदहरुमा लामो समय काम गरेका ६० वर्षीय क्यानेडियन नागरिक पिटर जोन ड्यालगिस काभ्रेमा २ किशोरसहित आपत्तिजनक अवस्थामा समातिएका छन्।
उनीमाथि बाल यौन दुराचारको मुद्दा चलाइएको छ। नेपालमा बाल यौन दुराचारमा १५ वर्षसम्मको कैद हुने व्यवस्था छ।
विदेशी नागरिकहरुले प्रलोभनमा पारी नेपाली बालकलाई यौन शोषण गर्ने गरेको सूचनाको आधारमा खोजी गर्दा ड्यालगिस शनिबार बिहान काभ्रेको मण्डन देउपुर गाविसबाट पक्राउ परेका हुन् ।
हिमालयन कम्युनिटी फाउन्डेसन सञ्चालन गरी पिटरले गत दुई वर्षमा गरिब तथा विपन्न समुदायमा शिक्षा तथा खानेपानीमा सहयोग गर्दै आएका थिए । उनले ती समुदायका बालबालिकालाई छनोट गरी पढाइदिने, विदेश घुमाइदिने र ठूलो भएपछि जागिर लगाइदिने प्रलोभन देखाई बालबालिकाको शोषण गर्ने गरेको केन्द्रीय अपराध ब्युरोले जानकारी दिएको छ।
पिटर बालबालिकाका क्षेत्रमा लामो समयदेखि काम गरिरहेका छन्। उनले तीनवटा मानार्थ विद्यावारिधि पाएका छन्। त्यस्तै उनले युएन ह्याबिट्याटको अफगानिस्तान प्रमुखको भूमिका निर्वाह गर्नुका साथै डब्लुएचओ र डब्लुएफपीमा समेत काम गरेका छन्।
प्रतिक्रिया दिनुहोस्